Në ditën e 15-të të grevës, naftëtarët e Patos‑Marinzës e kanë zhvendosur protestën e tyre përballë zyrave të kompanisë “Bankers Petroleum” në Fier.
Me pankarta në duar dhe thirrjet “Turp t’ju vijë”, ata kanë kërkuar njëzëri reagim nga kompania dhe një zgjidhje konkrete për plotësimin e kërkesave, teksa kanë dënuar intimidimin që u bëhet punonjësve për të bojkotuar grevën.
“Po u bëjnë presion punonjësve me litarin e varfërisë, me bukën e fëmijëve”, ka thënë kreu i sindikatës Dritan Shahu.
I shoqëruar nga dy fëmijët e tij, grevisti Eduart Selami ka pohuar se nuk do të dorëzohen. “Unë kam marrë edhe fëmijët me vete, se për këta fëmijë po punojmë. Duam atë që na takon dhe nuk dorëzohemi”, ka thënë ai.
Një ndër punonjësit më të vjetër të vendburimit, Ago Nuhaj, ka thënë ndër të tjerash se nuk do t’i lënë të argëtohen me djersën e tyre.
“Me dinjitetin dhe me djersën tonë ne nuk do t’i lëmë të argëtohen, se këta argëtohen edhe kur ne vuajmë”, ka theksuar Nuhaj.
Greva mund të ndalojë, por jo të dështojë. E rëndësishme është që u thye frika, ka shtuar grevisti.
Këtu ka humbur çdo vlerë, ka humbur identiteti kombëtar. Me para këta po blejnë çdo gjë, ka thënë grevisti Dritan Rrapushi.
“Investitorët e huaj duhet të sillnin zhvillim, por ata po sjellin vetëm mjerim. Ndaj duhet reagim popullor. Nuk dorëzohemi dhe nuk do të ndalemi, por do të shkojmë drejt Tiranës, aty ku është qendra e korrupsionit”, kanë deklaruar grevistët.
Prej gati tre javësh, minatorët janë mbledhur çdo ditë në hyrjen kryesore të kompanisë. Protestuesit deklarojnë se nuk do të tërhiqen derisa kërkesat e tyre të plotësohen.
Ata kërkojnë ndërhyrjen e institucioneve shtetërore për të garantuar të drejtat e tyre dhe kushtet minimale të sigurisë në punë.
Related posts:
U përplas me furgonin me pasagjerë, merr flakë ‘Benzi’ në aksin Fier-Lushnjë! Tre të plagosur
“Do bëhem e fortë për 7 fëmijët e mi”/ U përdhunua nga i ati, mamaja e vajzës së mitur në Fier kërkon ndihmë: Jemi pa strehë dhe bukë!
Kryeministri Rama mbërrin në Fier, takim me zyrtarët lokalë për lirimin e hapësirave publike
Aksident në aksin Fier-Roskovec, dy automjete përplasen dhe përfundojnë në kanal, plagosen dy persona
