Rasti qe do te trajtohet ditën e sotme ka te beje me një 64-vjeçare e cila është nënë e dy fëmijëve të rritur sot.
Në një lidhje live në emisionin “Me Zemër të Hapur” në News24, me autore Evis Ahmeti, gruaja tregon se para disa vitesh bashkëshorti i ka ndërruar jetë.
64-vjeçarja ka rrëfyer kalvarin për gjetjen e të birit, ndërsa bën apel për këdo që ka të dhëna në lidhje me ngjarjen që ta ndihmojë të zbulojë të vërtetën.
“Jam 64 vjeçe, nënë e dy fëmijëve. Historia ime fillon në janar të vitit 1989, në maternitetin e Fierit. Ishte lindja ime e dytë. Djali im i parë ishte vetëm 3 vjeç, por përvoja e parë e lindjes kishte lënë gjurmë të thella tek unë, një traumë që më ndiqte ende. Kur shkova për të lindur fëmijën e dytë, gjeta të njëjtën mami si në lindjen e parë. U frikësova. Nuk mund ta përballoja. U largova nga ai maternitet dhe shkova në spitalin e Fierit. Atje gjithçka shkoi mirë. E ndjeva dhimbjen, por edhe shpresën. E dëgjova beben time të qante. E pashë me sytë e mi që ishte i gjallë. Ishte një djalë i shëndetshëm, me peshë normale. Por pak më vonë, gjithçka ndryshoi. Mjekja njoftoi familjarët e mi se fëmija kishte lindur i vdekur. I thanë vjerrës time se fëmijën e nxorrën nga trupi im copa copa, por një gjë e tillë nukë shtë e vërtetë pasi unë e pashë që fëmija doli në rregull, madje edhe e peshuan ne peshore, ishte 3.5-3.6 kg.
Më thanë se unë kisha kryer një abort, një gjë që nuk ishte e vërtetë. Unë e di çfarë kam parë. Ai fëmijë qau. Ai ishte gjallë. Që prej asaj dite, nuk kam reshtur së kërkuari të vërtetën. Asnjëherë nuk më është dhënë një përgjigje. Unë besoj që ai fëmijë nuk ka vdekur. Unë e ndjej që ai është diku, gjallë. Dhe unë dua ta gjej. Kam jetuar me këtë dhimbje për dekada. Nuk dua më heshtje. Dua drejtësi. Dua djalin tim”, shprehet ajo.
