Një takim mes kryeministrit Edi Rama dhe djalit të miliarderit George Soros, Alex Soros raportohet se ka ndodhur gjatë ditëve të pushimeve në jug të vendit.

Sipas raportimeve, kreu i ekzekutivit e ka pritur Alex Soros në rezidencën qeveritare në Dhërmi, në bregdetin e jugut.

Lajmi për këtë vizitë është shoqëruar edhe me pamje. Foto nga prania e Alex Soros në rezidencën shtetërore janë publikuar nga faqja e njohur në rrjetin social Facebook, “Lolita”.

Është një nga ngjarjet më mbresëlënëse të astronomisë që ndodh vetëm një herë në jetë. Më 12 gusht, hëna do të kalojë drejtpërdrejt midis Tokës dhe Diellit në orën 15:34 GMT, duke hedhur hijen e saj mbi planet. Ndërsa miliona njerëz në Groenlandë, Islandë, Portugali dhe Spanjë po bëhen gati për të përjetuar një eklips total diellor — ku autoritetet spanjolle kanë kaluar në gatishmëri të lartë për shkak të turmave dhe rrezikut të zjarreve — vëmendja zhvendoset edhe te rajoni ynë.

Si do të duket eklipsi në Shqipëri?

Në territorin shqiptar, ky fenomen madhështor nuk do të jetë total, por do të mund të vëzhgohet si një eklips i pjesshëm. Për shkak të pozicionit gjeografik, hëna do të mbulojë vetëm një pjesë të diskut të diellit. Kjo do të thotë se qytetarët në Shqipëri nuk do të përjetojnë errësirën e plotë të ditës që shoqëron vendet e Evropës Perëndimore, por do të vërejnë vetëm një zbehje të lehtë të dritës gjatë orëve të pasdites.

Ndërkohë që në Spanjë kulmi i eklipsit pritet të arrihet pak para perëndimit të diellit (mes orës 20:26 dhe 20:33 me orën lokale), dashamirësit e astronomisë dhe qytetarët në Shqipëri që dëshirojnë të ndjekin eklipsin e pjesshëm ftohen të bëjnë kujdes maksimal.

Ekspertët përsërisin thirrjen se shikimi i drejtpërdrejtë i diellit pa syze të posaçme mbrojtëse ose pajisje të certifikuara është rreptësisht i ndaluar, pasi mbart rrezik serioz për dëmtimin e shikimit, pavarësisht faktit se hëna do të bllokojë vetëm një pjesë të rrezeve të tij.

Më pak të qara bebesh në maternitetet e vendit gjatë këtij viti, me lindjet që vijojnë rënien. Në 6 muajt e parë të 2026, kanë ardhur në jetë 10,229 fëmijë, nga 10,337 që ishin në gjashtëmujorin e parë të vitit të kaluar. Diferenca negative është ndikuar kryesisht nga tremujori i dytë (prill-maj-qershor) kur është regjistruar niveli më i ulët i dekadës për të njejtën periudhë të vitit. Të dhënat e Instat-it flasin për 5,083 bebe të ardhura në jetë, ose 158 më pak krahasuar më vitin e kaluar.

Gjatë këtij tremujori 45% e totalit të lindjeve janë në qarkun e Tiranës me 2.310 lindje, ndërsa me numrin më të ulët është qarku Gjirokastër me 66 lindje. Edhe pse tremujori i dytë është në terren pozitiv pasi janë regjistruar 218 lindje më shumë sesa vdekje, gjysma e parë e vitit mbyllet me bilanc negativ.

Në 6 muajt e parë të vitit, shtesa natyrore ka rezultuar negative, me numrin e vdekjeve, më të lartë se i lindjeve. Nga janari deri në qershor kanë ndërruar jetë 10,379 persona, ose 150 vdekje më shumë se lindje.

Ekspertët e lidhin këtë situatë me emigracionin e lartë të të rinjve, plakjen e popullsisë dhe uljen e numrit të çifteve që zgjedhin të kenë fëmijë. Sipas raportit të publikuar nga INSTAT pak javë me parë mosha mesatare në vend ka rritur në 45 vjeç nga 44,3 vjeç që ishte vjet. Për shkak të këtyre lëvizjeve demografike 35.7% e popullsisë së vendit është mbi 65 vjeç.

Tkurrja e lindjeve, e kombinuar me largimin e forcës së re të punës jashtë vendit dhe plakja e popullsisë, po krijon pasoja të drejtpërdrejta edhe për ekonominë shqiptare. Bizneset po përballen me mungesë të punonjësve, ndërsa mosha mesatare e popullsisë po rritet me ritme të shpejta, duke shtuar presionin mbi tregun e punës dhe sistemin e pensioneve në vitet e ardhshme.

Tetë vatra zjarri vijojnë të jenë aktive në qarqet Tiranë, Fier, Durrës, Gjirokastër dhe Dibër, ndërsa strukturat e emergjencave civile dhe Forcat e Armatosura po vijojnë ndërhyrjet për izolimin dhe shuarjen e tyre.

Sipas informacionit të Ministrisë së Mbrojtjes, deri në orën 16:00 në operacionet për përballimin e situatës janë angazhuar 165 forca operacionale, mes tyre 85 efektivë të Forcave të Armatosura. Gjatë ditës janë zhvilluar gjithashtu 7 misione ajrore me helikopterë dhe 2 misione me avionë Air Tractor.

Në Dajt, në territorin e bashkisë Tiranë, zjarri është riaktivizuar në pyllin me pisha, mbi tunelet e Qafë Mollës. Në terren ndodhen 22 forca të MZSH-së dhe ADZM-së Tiranë, ndërsa ndërhyrja është mbështetur edhe nga një helikopter i Forcave të Armatosura. Paralelisht, vijon puna për shuarjen e zjarrit në Priskë të Madhe. Autoritetet bëjnë me dije se aktualisht nuk ka rrezik për zonat e banuara.

Në Drenie të bashkisë Patos, një vatër që ishte vënë nën kontroll është riaktivizuar në thellësi të pyllit. Për shuarjen e saj po përdoren edhe dy avionë Air Tractor. Sipas Ministrisë së Mbrojtjes, situata në këtë zonë paraqitet në përmirësim.

Situatë aktive vijon edhe në Krujë, ku po punohet në dy vatra. Në lagjen Abaze, zjarri është favorizuar nga era dhe ka pasur përhapje, por aktualisht nuk paraqet rrezik për banesat.

Më problematike paraqitet situata në Krastë–Halil, ku zjarri u përkeqësua gjatë orëve të para të mëngjesit dhe rrezikoi banesat. Ndërhyrja e dy helikopterëve ka ndihmuar në normalizimin e situatës, ndërsa forcat në terren vijojnë punën për izolimin dhe shuarjen përfundimtare të vatrës.

Në malin e Nëmerçkës, në bashkinë Përmet, operacioni për shuarjen e zjarrit vazhdon. Vatra nuk paraqet rrezik për zonat e banuara. Ndërkohë, një vatër e re është evidentuar në malin e Dhëmbelit, mbi fshatin Badilonjë, ku forcat e MZSH-së Përmet janë angazhuar për ndërhyrjen.

Në Gurë-Lurë, në bashkinë Dibër, është evidentuar një tjetër vatër zjarri në një sipërfaqe me pyll pishe dhe kullotë. Forcat operacionale po punojnë intensivisht për shuarjen dhe vënien nën kontroll të flakëve.

Autoritetet vijojnë monitorimin e situatës në të gjitha zonat problematike. Situata po monitorohet në mënyrë të vazhdueshme dhe ndërhyrjet do të vijojnë deri në normalizimin e plotë të vatrave aktive.

/rtsh.al/

Deputetja e Partisë Demokratike, Jorida Tabaku, ka denoncuar atë që e cilëson si një tjetër shembull të “shtetit personal”, ku politikat fiskale të qeverisë nuk u shërbejnë sektorëve të gjerë të ekonomisë, por një rrethi të kufizuar kompanish të privilegjuara.

Në një reagim në rrjetet sociale, Tabaku ka krahasuar refuzimin e vazhdueshëm të kërkesave të fermerëve dhe blegtorëve për lehtësimin e TVSH-së me nismën e fundit të qeverisë për të përfshirë në listën e makinerive të përjashtuara nga TVSH-ja edhe ato që përdoren ose do të përdoren nga kompania KAYO.

“Si ta kuptojmë shtetin personal? Është folur gjatë për ligjet me porosi dhe shtetin personal. Megjithatë, ka ende qytetarë që pyesin se si mund të dallohet një politikë e tillë. Ja një shembull i freskët”, shkruan Tabaku.

Sipas saj, fermerët dhe blegtorët kërkojnë prej më shumë se një mandati lehtësimin e TVSH-së për bujqësinë, një sektor që përbën rreth 15% të Prodhimit të Brendshëm Bruto, punëson një pjesë të konsiderueshme të shqiptarëve dhe po përjeton një prej rënieve më të forta në ekonomi.

Tabaku thekson se kjo kërkesë është refuzuar vazhdimisht nga ministrat përgjegjës gjatë diskutimeve në Komisionin për Ekonominë dhe Financat, ndërsa për kompani të lidhura me interesat e qeverisë krijohen me shpejtësi lehtësi të posaçme.

“Për bujqit nuk gjendet zgjidhje. Për kompanitë pranë oborrit qeveritar gjenden menjëherë përjashtime fiskale, status investitori strategjik dhe tokë publike”, shprehet deputetja demokrate.

Ajo sjell si krahasim edhe politikat e vendeve të rajonit, të cilat aplikojnë norma më të ulëta për produktet e shportës ushqimore dhe mbështesin konkurrueshmërinë e prodhimit vendas. Në Shqipëri, sipas Tabakut, qeveria vazhdon t’i rëndojë fermerët me TVSH, të dobësojë produktet “Made in Albania” dhe të nxisë informalitetin.

“Një qeveri në krah të një pakice të privilegjuar dhe kundër shumicës së harruar. Ky është shteti personal. Ky është sistemi socialist”, përfundon Tabaku.

Reagimi i plote:

Si ta kuptojmë shtetin personal?

Është folur gjatë për ligjet me porosi dhe shtetin personal. Megjithatë, ka ende qytetarë që pyesin se si mund të dallohet një politikë e tillë.

Ja një shembull i freskët.

Pak javë më parë, qeveria ndërmori një nismë për të përfshirë në listën e makinerive të përjashtuara nga TVSH-ja edhe ato që përdoren ose do të përdoren nga kompania KAYO.

Ndërkohë, prej më shumë se një mandati, fermerët dhe blegtorët kërkojnë lehtësimin e TVSH-së për bujqësinë—një sektor që përbën rreth 15% të PBB-së, punëson një pjesë të madhe të shqiptarëve dhe po përjeton një nga rëniet më të forta në ekonominë tonë.

Në çdo diskutim në Komisionin për Ekonominë dhe Financat, ministrat përgjegjës për bujqësinë e kanë refuzuar këtë kërkesë.

Për bujqit nuk gjendet zgjidhje. Për kompanitë pranë oborrit qeveritar gjenden menjëherë përjashtime fiskale, status investitori strategjik dhe tokë publike.

Vendet e rajonit aplikojnë norma më të ulëta për produktet e shportës ushqimore, duke i bërë prodhuesit e tyre më konkurrues. Qeveria socialiste, përkundrazi, vazhdon t’i rëndojë fermerët me TVSH, të dobësojë produktet “Made in Albania” dhe të ushqejë informalitetin.

Një qeveri në krah të një pakice të privilegjuar dhe kundër shumicës së harruar.

Ky është shteti personal. Ky është sistemi socialist.