Një aksident i rëndë është shënuar mbrëmjen e së enjtes në aksin rrugor që lidh Fishtën, në superstradën Lezhë–Shkodër, ku një automjet tip “Audi” ka përplasur një 12-vjeçar që lëvizte me monopatinë.
Përplasja ka qenë e rëndë dhe i mituri ka humbur jetën gjatë transportimit për në spital.
Pas përplasjes, makina ka dalë nga rruga dhe ka përfunduar në kanal.
Në vendngjarje kanë mbërritur shërbimet e Policisë, të cilat kanë nisur hetimet për zbardhjen e plotë të rrethanave dhe dinamikës së aksidentit.
Drejtuesi i automjetit është shoqëruar nga policia, ndërkohë që vijojnë hetimet për të përcaktuar shkakun e aksidentit tragjik.