Nga Hilmi Saliu/ Rrufe në qiell të hapur, Sedat Pajaziti nuk do të jetë më trajner i Apolonisë. “Panorama Sport” mëson se klubi dhe trajneri kanë ndërprerë me konsensus bashkëpunimin mes tyre.
Nuk ka zgjatur as shtatë muaj aventura e 52- vjeçarit në krye të pankinës fierake. Erdhi në fund të shtatorit dhe largohet pa u mbyllur ende marsi. Vlen për t’u theksuar se në verë u afrua tek Apolonia si drejtor teknik dhe në shtator u konfirmua si pasuesi i ish-trajnerit Artan Mërgjyshi. Apolonia nuk po kalon një moment të mirë në fazën e tretë të Kategorisë së Parë. Pas gjashtë ndeshjesh të kësaj faze, fierakët kanë marrë një fitore, tri barazime dhe dy humbje, që e kanë lënë jashtë pritshmërive dhe objektivave të fillimit të sezonit.
Situata po reflektohet javë pas jave, pasi Apolonia u rikthye te fitorja në shtëpi pas 50 ditësh, kundër Valbonës me rezultatin 2-1. Ishte një takim që u zgjidh me shumë vështirësi dhe vonë nga ana e fierakëve. Presidencës nuk i ka pëlqyer aspak si shkoi ndeshja e fundit, ndonëse u arrit fitorja. Ndaj, të hënën në mbrëmje, u zhvillua një mbledhje në klub dhe në fund u vendos me konsensus për të ndërprerë bashkëpunimin me trajnerin. Edhe pse tekniku mori përsipër që të drejtonte një ekip ku dominonin të rinjtë dhe pa përvojën e duhur, drejtuesit prisnin të tjera rezultate. Burime të “Panorama Sport” pohojnë se drejtuesit më të lartë fierakë nuk kanë dashur vijimin e punës, si pasojë e mungesës së theksuar të rezultateve dhe të qenurit jashtë pritshmërive dhe objektivave të fillimit të sezonit.7PAJAZITI- I kontaktuar nga “Panorama Sport”, trajneri Sedat Pajaziti ka deklaruar: “Të hënën në mbrëmje kemi pasur një takim në klub, ku është diskutuar gjerë e gjatë rreth ecurisë, rezultateve e objektivave dhe në fund kemi vendosur të ndërpresim me konsensus bashkëpunimin. Ne ishim jashtë pritshmërive dhe objektivave të fillimit të sezonit, por të mos harrojmë që e kam marrë ekipin kur ishte në zonën e ‘ftohtë’ në renditje dhe rrezikonte seriozisht mbijetesën. Në njëfarë mënyre kemi bërë hapa të rëndësishëm, pasi jemi në vendin e 7-të dhe vetëm 3 pikë diferencë nga Pogradeci e Lushnja, që janë më të afërtat për zonën ‘play off’. Nuk ka problem, u uroj suksese të mëtejshme.”
PASUESI- Situatës së vështirë i shtohet edhe një hall për t’u zgjidhur, gjetja e trajnerit të parë. Megjithatë, zgjedhja e tij do të marrë kohën e nevojshme. Ekipi pritet të drejtohet në mënyrë të përkohshme nga Rudin Nako dhe Nuredin Orelesi, të cilët janë pjesë e stafit teknik dhe trajnerë në akademinë fierake, pikërisht të grupmoshave U16 dhe U-18. Avantazhi i tyre i madh është se ata e njohin shumë mirë ekipin, ambientin, por edhe Kategorinë e Parë.
