Një aksident automobilistik ka ndodhur mesditën e sotme në rrugën nacionale Fier-Shegan-Kuçovë.
Sipas informacioneve paraprake, një automjet i tonazhit të rëndë, tip trajler, dyshohet se është përfshirë në një përplasje mes disa automjeteve. Dy prej mjeteve kanë pësuar dëme të konsiderueshme, ndërsa një e re ka mbetur e dëmtuar dhe është transportuar me urgjencë drejt spitalit të Lushnjës.
Automjeti që drejtohej nga e reja ka përfunduar i përplasur me një shtyllë të tensionit, ndërsa një automjet tjetër, tip Audi ka pësuar dëme materiale.
Ende nuk është e qartë dinamika e plotë e aksidentit dhe nëse përplasja mes dy automjeteve ka ardhur si pasojë e manovrave të trajlerit.
Pas mbërritjes në vendngjarje, policia ka nisur hetimet për zbardhjen e rrethanave dhe përcaktimin e përgjegjësive. Ndërkohë, shërbimet e policisë janë vënë në kërkim të trajlerit, i cili dyshohet se është larguar nga vendi i aksidentit pas përplasjes.
Priten të dhëna të tjera nga policia për të sqaruar dinamikën e aksidentit në këtë aks rrugor, i cili lidh zonën e Kuçovës me Lushnjën.
Leave a Reply