Sot u zhvilluan katër ndeshje të vlefshme për javën e 21-të të Kategorisë së Parë, ku vëmendja e tifozerise fierake ishte përqendruar te përballja mes Apolonisë dhe Pogradecit, një prej ekipeve pretendente për ngjitjen në Superligë.
Sfida e luajtur në Fier u mbyll me rezultatin 2-2, pas një fundi dramatik dhe të shoqëruar me polemika.
Apolonia më në fund gjeti rrugën e rrjetës, falë rikthimit nga një pezullim i gjatë të sulmuesit Umejiego, i cili festoi kthimin në fushë me një dygolësh spektakolar. Pas golit te pare te shenuar nga miqtë fierakët kaluan në avantazh dhe e udhëhoqën ndeshjen deri në minutat e fundit, duke qenë shumë pranë një fitoreje me peshë.
Megjithatë, në minutën e 88-të të takimit, arbitri akordoi një penallti të diskutueshme për Pogradecin, e cila u shndërrua në gol nga Zguro në minutën 90+7’, duke barazuar rezultatin. Pas vendimit për penalltinë, futbollistët e Apolonisë u tërhoqën për disa minuta nga fusha e lojës në shenjë proteste.
Golat e takimit u shënuan nga Umejiego në minutat 30’ dhe 48’ për Apoloninë, ndërsa për Pogradecin realizuan Danladi në minutën 11’ dhe Zguro nga pika e bardhë në fundin e ndeshjes.
Një barazim që lë shije të hidhur për Apoloninë, e cila ishte shumë pranë tre pikëve, por që njëkohësisht konfirmon rikthimin e fuqishëm të Umejiegos dhe një paraqitje pozitive të fierakëve ndaj një kundërshtari të fortë.