Pas 42 vitesh punë, sakrificash dhe përkushtimi në shërbim të shëndetit, mjeku i njohur fierak Lulzim Banushaj ka dalë në pension, duke mbyllur një kapitull të gjatë të jetës së tij profesionale.
Ky moment i rëndësishëm u festua në një atmosferë të ngrohtë mes miqsh, kolegësh dhe bashkëpunëtorësh të mjekësisë fierake, të cilët ndanë me të emocionet e një rrugëtimi të gjatë dhe plot përkushtim.
Në mesazhin e tij, Banushaj shprehet me emocion: “Më në fund, në pension! 42 vjet punë, sakrifica e përkushtime në shërbim të shëndetit, ditë e natë, me ndjenja e emocione të pafundme.”
Edhe pse nis një etapë të re të jetës pranë familjes dhe miqve, ai thekson se nuk do të shkëputet nga profesioni dhe shërbimi ndaj shëndetit, një mision që e ka shoqëruar për më shumë se katër dekada.
Dalja në pension e tij përbën mbylljen e një karriere të vlerësuar dhe një moment të veçantë për komunitetin e mjekësisë në Fier.
Me kete rast i urojmë pension të mbarë, shëndet, qetësi dhe sa më shumë momente të bukura pranë familjes dhe njerëzve tuaj të dashur.
Faleminderit për kontributin dhe përkushtimin ndër vite!
