Me mbështetjen e sindikatës, dhjetra punonjës të “Bankers Petroleum” protestuan sot në Marinzë, duke kërkuar rritjen e pagave dhe përmirësimin e kushteve të punës. Nëse kërkesat nuk plotësohen, ata paralajmëruan greve urie.
Dhjetra punonjës të kompanisë Bankers Petroleum janë ngritur mesditën e sotme në një protestë të organizuar nga Sindikata e Sektorit Hidrokarbur.
Me pankarta në duar ata janë mbledhur para zyrave të kompanisë në Marinzë, teksa kanë shfrytëzuar orarin e pushimit.
Kryetari i Sindikatës i ka bërë një thirrje të drejtpërdrejtë dhe të fortë shoqërisë Bankers dhe drejtuesve të saj që të ndalojnë së injoruari zërin e punonjësve duke u ndalur në disa kërkesa kryesore, si respektimin e të drejtave të punëtorëve, rritjen e pagave, zbatimin e kontratës kolektive të punës, ndalimin e intimidimit dhe presionit psikologjik ndaj punonjësve, ndalimin e diskriminimit dhe pabarazisë në trajtim dhe përfitime, aplikimin e statusit të naftëtarit dhe përmirësimin e kushteve të punës.
Ndërsa Sekretari i Sindikatës tha se nuk po kërkojnë lëmoshë por drejtësi sociale.
Kurse vetë punëtorët thanë se prej vitesh Bankers nuk merr në konsideratë kërkesën për rritjen e pagave.
Organizatorët paralajmëruan se protestat do të përshkallëzohen deri në grevë urie dhe pezullim të aktivitetit në kompaninë naftënxjerrëse.
Leave a Reply