Modelja Sara Gjoka ishte e ftuar në “Live From Tirana” për të treguar mbi mënyrën se si njihen sot të rinjtë. Sara rrëfeu edhe detaje nga jeta e saj private…
Shumë vajza sot përdorin termin ‘influencer’ për veten e tyre. A i tërheq më shumë meshkujt kur je e famshme?
Për mendimin tim ‘influencer’ ka të bëjë komplet me gjë tjetër, të jesh modele është gjë tjetër, TV presenter është gjë tjetër. Nuk mund të bëhesh nga hiçi influencer. Kanë krijuar një lloj ideje që të jesh influencer dhe të kesh influencë tek njerëzit, do jesh më e kërkuar nga meshkujt.
Pse vajzat e ekranit janë më të kërkuara nga meshkujt? A përdoret televizioni nga vajzat e reja që në të vërtetë nuk e duan atë, për këtë qëllim?
Është shumë e vërtetë, shumica e vajzave e bëjnë. Shoh shpesh që shumë emisione i shfrytëzojnë për këtë arsye. Shumë emisione që nuk kanë të bëjnë fare me këtë pjesë, mund të jenë emisione modelingu, dashurie dhe qëllimi i tyre kryesor nuk është ai i emisionit. Por është ky i qenurit e famshme dhe të krijuarit një profil për të cilin krijohen këto raportet e tjera… Vajzat këtë gjë kërkojnë sot.
Pse meshkujt sot tërhiqen pas vajzave të ekranit?
Mund të kesh vajza sot që janë shumë më të mira se vajzat e ekranit, por krijohet ajo ideja që ajo është më e paarritshme se një vajzë më e thjeshtë. Sepse ajo ka një stad tjetër, është më e famshme, ka më shumë kërkesa sepse e pëlqejnë shumë veta. Ndërsa atë vajzën e thjeshtë mund ta njohin 5 djem dhe ta pëlqejnë 2.
Po për të krijuar familje, kë zgjedhin djemtë?
Për t’u martuar dhe për të krijuar familje nuk e zgjedhin kurrë atë të famshmen. Djemtë e kanë këtë euforinë dhe qejfin e momentit, fiksimin, pasionin. Por në final zgjedhin një vajzë për shtëpi, të thjeshtë, që nuk e njeh askush, që nuk është shumë seksi.