Banorët e Patosit kanë protestuar sërish kundër propozimit për shkrirjen e bashkisë Patos dhe bashkimin e saj me bashkinë e Fierit, duke kundërshtuar draftin e reformës territoriale të propozuar nga mazhoranca socialiste.
Në tubimin e zhvilluar këtë të mërkurë, banorët shprehën shqetësimin se bashkimi me Fierin do të sjellë humbje të shërbimeve publike dhe do të ndikojë në vëmendjen që i kushtohet zonës dhe nevojave të komunitetit.
Patosi është një prej 15 bashkive që parashikohet të shkrihen sipas draftit të propozuar nga socialistët. Prej afro një muaji, banorët dhe përfaqësuesit vendorë kanë shprehur kundërshtimin ndaj kësaj nisme.
Në këshillin bashkiak të Patosit, anëtarët e Partisë Socialiste dhe Partisë Demokratike kanë bashkuar votat kundër propozimit për shkrirjen e bashkisë, ndërsa protesta e sotme u zhvillua si një tjetër reagim i komunitetit ndaj reformës së propozuar.
Protestuesit deklaruan se nuk janë dëgjuar nga deputetët socialistë dhe ngritën kritika ndaj ministrit të Shtetit për Pushtetin Vendor, Arbjan Mazniku, duke pretenduar se ai nuk njeh historinë dhe problematikat e zonës.
Humbja e shërbimeve publike mbetet argumenti kryesor i banorëve kundër bashkimit me Fierin. Ata shprehen se, nëse bashkia Patos shkrihet, zona rrezikon të mbetet në harresë dhe komuniteti të ketë më pak akses në shërbime.
Banorët paralajmëruan se protesta e zhvilluar sot nuk do të jetë e fundit. Ata thanë se, nëse kërkesat e tyre nuk merren në konsideratë nga mazhoranca, do të përshkallëzojnë reagimin dhe protestat në mbrojtje të bashkisë Patos.