Një vatër e re zjarri është rishfaqur në Mallakastër, këtë herë në zonën e Kalivaçit, ku situata paraqitet shqetësuese për shkak të përhapjes së shpejtë të flakëve.
Për shuarjen e zjarrit po ndërhyhet edhe nga ajri me avion, ndërsa në terren janë angazhuar strukturat zjarrfikëse dhe forcat e policisë.
Policia ka ndërhyrë menjëherë për evakuimin e disa familjeve, pasi flakët kanë përfshirë sipërfaqe të mëdha dhe po rrezikojnë banesat dhe banorët e zonës.
Era e fortë po favorizon përhapjen e zjarrit dhe po e vështirëson punën e forcave në terren. Deri tani raportohen dëme të konsiderueshme në bimësi.
Të gjitha strukturat janë angazhuar për izolimin dhe shuarjen e flakëve, të cilat po përhapen në drejtim të fshatrave Hekal, Panahor, Riban dhe Ngraçan.Situata mbetet nën monitorim, ndërsa ndërhyrja nga toka dhe ajri vijon për të parandaluar afrimin e zjarrit pranë zonave të banuara.
Leave a Reply