Autoriteti Rrugor Shqiptar informon se nga dita e sotme, do të nisin punimet e parashikuara, për plotësimin e punimeve dhe përmirësimi estetik nga sheshi Shqiponja deri te nënkalimi i Limuthit.
Projekti përfshin ndërtimin e mbikalimeve për këmbësorët, gjelbërimin e segmentit rrugor, realizimin e sistemit të ndriçimit rrugor, si dhe përmirësimin e shtresave asfaltike në segmentin nga Sheshi Shqiponja deri në pikën e lidhjes me autostradën e re. Gjithashtu, do të realizohen edhe punime të tjera të parashikuara në projekt.
Sipas ARRSH-së, gjatë zhvillimit të punimeve, në zbatim të planit të menaxhimit të trafikut, do të bëhet devijimi i përkohshëm i njërës prej korsive të qarkullimit, duke garantuar vijimësinë e lëvizjes së mjeteve në korsitë e tjera të disponueshme.
ARRSH informon se kontraktori ka marrë masat e nevojshme për organizimin e trafikut, vendosjen e sinjalistikës së përkohshme dhe zbatimin e të gjitha masave të sigurisë rrugore, me qëllim garantimin e sigurisë së përdoruesve të rrugës dhe të personelit që në kantier.
Në njoftimin e ARRSH, thuhet se kërkohet mirëkuptim nga ana e drejtuesve të mjeteve gjatë zhvillimit të punimeve, si dhe respektim i sinjalistikës së përkohshme dhe udhëzimeve të punonjësve në terren.
Leave a Reply