NJOFTIM
Bashkia Fier, përmes Drejtorisë së Taksave dhe Tarifave Vendore, njofton qytetarët, pronarët e njësive tregtare dhe bizneset që rezultojnë debitorë për detyrimet vendore, taksat familjare dhe tokën bujqësore, se mund të përfitojnë nga fshirja e plotë ose e pjesshme e detyrimeve, si dhe nga falja e kamatëvonesave dhe gjobave, sipas periudhës së krijimit të tyre.
Me daljen e Udhëzimit të Ministrisë së Financave nr. 11, datë 14.05.2026, ka nisur zbatimi i ligjit nr. 86/2025 “Për faljen dhe lehtësimin e detyrimeve vendore”, ku detyrimet që i përkasin periudhës deri më 31 dhjetor 2014 fshihen plotësisht, pa kryer asnjë pagesë dhe pa pasur nevojë për asnjë veprim nga ana e taksapaguesve vendorë.
Për detyrimet e periudhës 1 janar 2015 deri më 31 dhjetor 2019, parashikohen dy alternativa për përfitim:
Subjektet që kryejnë pagesën deri më 30 qershor 2026 do të paguajnë 50% të detyrimit dhe do t’u falet pjesa e mbetur.
Subjektet që kryejnë pagesën deri më 31 dhjetor 2026 do të paguajnë 75% të detyrimit dhe do t’u falet pjesa e mbetur.
Në të dyja rastet falen të gjitha kamatëvonesat dhe gjobat.
Në rastet kur principali është paguar më herët dhe kanë mbetur vetëm gjobat, edhe këto detyrime falen.
Për detyrimet e krijuara në periudhën 1 janar 2020 deri më 31 dhjetor 2024 kërkohet pagesa e plotë e principalit deri më 31 dhjetor 2026 dhe, pas kryerjes së pagesës, falen kamatëvonesat dhe gjobat.
Për çdo paqartësi ose informacion të mëtejshëm, tatimpaguesit mund të paraqiten pranë sporteleve të Bashkisë Fier dhe sporteleve të njësive administrative.
