Futbolli fierak vazhdon të jetë një “minierë” e pashtershme talentesh, dhe emri më i fundit që po tërheq vëmendjen e specialistëve është Romeo Hazizaj.
Djaloshi i lindur në vitin 2011, i cili aktivizohet me ekipin e FC Apollo 2016, po tregon një rritje të jashtëzakonshme dhe po kthehet në një shtyllë të rëndësishme për moshat e Kombëtares Shqiptare.
Hazizaj, i cili luan në pozicionin e mbrojtësit të krahut të djathtë, është përzgjedhur prej dy vitesh si pjesë e Elite Youth Development Academy – programi prestigjioz i zhvillimit të talenteve i bashkërenduar nga FSHF dhe UEFA.
Kjo akademi grumbullon elementët më premtues në vend, dhe prania e Romeos aty tregon qartë potencialin e tij të madh.
Performancat e tij të mira në nivel klubi u pasqyruan menjëherë edhe në arenën ndërkombëtare.
Deri më tani, Hazizaj ka regjistruar 7 paraqitje zyrtare me Kombëtaret U-14 dhe U-15, duke u shndërruar me meritë në një nga lojtarët bazë të formacionit kuqezi.
I njohur në fushë për shpejtësinë e tij shpërthyese, karakterin luftarak në çdo duel dhe inteligjencën taktike në leximin e lojës, Romeo Hazizaj përfaqëson profilet moderne të mbrojtësit të krahut që kërkon futbolli sot.
Redaksia e Fieri Sot i uron shumë suksese djaloshit kuqezi!
Suksese, Romeo!
Leave a Reply