Makina përplaset me motorin në rrugën Fier-Patos, plagosen dy drejtuesit dhe pasagjerja! 

Një aksident ka ndodhur mesditën e sotme, në aksin rrugor Fier-Patos.

Një automjet është përplasur me një motor, dhe si pasojë e përplasjes së fortë kanë mbetur 3 të plagosur; drejtuesi i motorit, drejtuesi i automjetit dhe pasagjerja që udhëtonte me të.

Ata janë transportuar drejt Spitalit Rajonal Fier, ku po marrin ndihmën e nevojshme mjekësore, ndërsa policia dhe grupi hetimor ndodhen në vendngjarje për të përcaktuar shkaqet e aksidentit, por edhe për të disiplinuar trafikun.

“Rreth orës 13:30, në aksin rrugor Fier-Patos, automjeti me drejtues shtetasin A. A. është përplasur me motomjetin me drejtues shtetasin G. M., 30 vjeç, banues në Patos. Si pasojë e përplasjes janë dëmtuar G. M., A. A., dhe pasagjerja në automjet, E. A., të cilët ndodhen në spital, në kujdesin e mjekëve. Grupi hetimor po punon për sqarimin e plotë të rrethanave dhe shkakut të aksidentit”, thuhet në njoftimin zyrtar.

Ky aks rrugor gjatë muajve të verës është me trafik mjaft të rënduar, ndërsa nuk kanë munguar edhe aksidentet e shumta.