Manastiri i Ardenicës, i ndërtuar në shekullin XIII dhe i njohur për vlerat arkitekturore dhe pikturat murale, vijon të jetë pikë referimi edhe për ngjarje kulturore dhe përkujtimore që lidhen me historinë shqiptare.
I tillë ishte edhe improvizimi artistik i fëmijëve të Qendrës Kulturore Lushnjë, në përkujtim të 26 prillit 1451, kur Gjergj Kastriot Skënderbeu lidhi kurorë me Donika Arianitin.
Kryeministri Edi Rama ndau sot momente nga interpretimi i fëmijëve, të cilët përcollën në formë skenike momente të lidhura me këtë përvjetor të rëndësishëm që ndërthur historinë kombëtare me trashëgiminë shpirtërore dhe kulturore të Shqipërisë.
Sipas të dhënave historike, më 26 prill 1451, në këtë manastir u zhvillua ceremonia e kurorëzimit të heroit kombëtar me Donika Arianitin, vajzën e princit të njohur shqiptar Gjergj Arianiti.
Martesa e Skënderbeut me Donika Arianitin konsiderohet një ngjarje me peshë politike dhe simbolike, pasi forcoi aleancat mes familjeve të mëdha fisnike shqiptare në kohën e përballjes me Perandorinë Osmane.
Aktivitete të tilla synojnë të ndërthurin trashëgiminë historike me artin dhe edukimin, duke e bërë kujtesën historike pjesë aktive të jetës kulturore në vend.
/m.m/j.p/
