Kontrollet me pajisje inteligjente në Fier, mbi 880 masa administrative

 Policia Rrugore e Fierit ka intensifikuar kontrollet në akset rrugore, pikat hyrëse-dalëse dhe rrugët urbane, interurbane e lokale, me përdorimin e pajisjeve inteligjente, me synim parandalimin e aksidenteve dhe menaxhimin e trafikut.

Gjatë javës së fundit janë proceduar penalisht 7 shtetas për shkelje të ndryshme të Kodit Rrugor.

Policia informon se 2 drejtues mjetesh janë arrestuar në flagrancë për shkelje të rregullave të qarkullimit rrugor në lidhje me aksidente rrugore, ndërsa 5 të tjerë janë proceduar për drejtim të mjetit pa leje drejtimi dhe ndiqen në gjendje të lirë.

Policia Rrugore ka vendosur 694 masa administrative për tejkalim të shpejtësisë në rrugët interurbane dhe autostradën A2, 43 masa për mospërdorimin e rripit të sigurimit, 5 për përdorimin e celularit gjatë drejtimit të mjetit dhe 36 për parakalim të gabuar.

Gjithashtu, janë vendosur 5 masa administrative për drejtim automjeti nën efektin e alkoolit, 7 për kryerjen e manovrave të rrezikshme dhe 91 masa për shkelje të tjera të rregullave të qarkullimit rrugor, të konsideruara burim potencial për aksidente.

Në vijim të kontrolleve, janë sekuestruar edhe 5 motomjete që qarkullonin pa dokumentacionin dhe targat përkatëse.

Policia Rrugore Fier apelon drejtuesit e mjeteve dhe të gjithë përdoruesit e rrugës të respektojnë me rigorozitet rregullat e qarkullimit, me qëllim rritjen e sigurisë rrugore, mbrojtjen e jetës dhe shëndetit, si dhe garantimin e një qarkullimi të sigurt dhe pa pengesa.