Në Spitalin Rajonal Memorial Fier është realizuar për herë të parë implantimi i një pacemaker-i permanent te një paciente me çrregullime të rënda të ritmit të zemrës.
Ministrja e Shëndetësisë dhe Mirëqenies Sociale, Klodiana Spahiu, në një postim në rrjetet sociale, theksoi se kjo ndërhyrje shënon një hap në zgjerimin e shërbimeve të specializuara kardiologjike në këtë spital.
Sipas Spahiut, ofrimi i këtij shërbimi synon të mundësojë trajtimin e pacientëve me probleme kardiologjike pranë vendbanimit, duke zgjeruar aksesin në kujdesin shëndetësor të specializuar.
Spitali Rajonal Memorial Fier, një investim i Turqisë, ofron shërbime të nivelit terciar për të gjithë rajonin e jugut të vendit. Me një kapacitet prej 150 shtretërish, ky spital aplikon për herë të parë në vend modelin e autonomisë spitalore.
Spitali ofron shërbime në urgjencë, kirurgji, neurokirurgji, kirurgji kardiovaskulare, mjekësi interne, kardiologji, neurologji, sëmundje infektive, pneumologji, ortopedi dhe traumatologji.
Leave a Reply