Lidhja mes nënës dhe fëmijës nis që përpara lindjes dhe zhvillimi i tij vazhdon edhe pas ardhjes në jetë. Përmes kësaj lidhjeje të veçantë, fëmija arrin të perceptojë emocionet, gjendjen dhe reagimet e nënës, duke krijuar bazat e para të komunikimit dhe të sigurisë emocionale.

Sipas pediatres së mirënjohur Lira Gjika, e ftuar sot, më 23 korrik, në emisionin “Shije Shtëpie”, ushqyerja me gji është një nga mënyrat e para përmes së cilës fëmija njeh nënën dhe krijon lidhjen me të. Sipas saj, procesi i të mësuarit nis që me ushqyerjen dhe kontaktin e parë të fëmijës me gjirin e nënës.

“Sa më shumë fëmija të zbulojë nënën, aq më shumë botë apo univers zbulon. Jeta fillon në trupin e nënës dhe, teksa fëmija dëgjon tingullin e zemrës së nënës, rregullon edhe të rrahurat e zemrës së vet. Pasi vjen në jetë, duhet shumë kujdes. Mjedisi ku ka një nënë dhe një fëmijë në gji duhet të jetë i vëmendshëm dhe i butë.”

Pediatria pohoi se qumështi i gjirit që prodhon nëna është personal dhe asnjë qumësht formule nuk mund ta zëvendësojë, pasi çdo nënë prodhon qumësht të përshtatur me nevojat e fëmijës së saj.

Në rastet kur nëna nuk ka dëshirën apo vullnetin për ta ushqyer foshnjën me qumësht gjiri, sipas mjekes Gjika, është më mirë të mos e bëjë këtë me detyrim.

“Është e studiuar që nëse nëna nuk dëshiron ta ushqejë me qumësht gjiri, më mirë mos ta ushqejë me zor, sepse i transmeton atë neverinë e vet, pasi ka plot nëna që nuk e përjetojnë mirë periudhën e gjirit. Sado i shëndetshëm të jetë ushqimi, nëse ia transmeton nëpërmjet neverisë, është po aq i dëmshëm sa çdo ushqim i dëmshëm. Prandaj kanë dalë edhe këto kurset që ta përgatisin nënën që ta ushqejë të paktën 6 muaj me gji fëmijën.”

Sipas pediatres, ushqyerja vetëm me gji e një fëmije gjatë vitit të parë të jetës mund të jetë e pamjaftueshme, pasi, sipas saj, truri i fëmijës ka nevojë për proteinën shtazore për t’u zhvilluar dhe rritur.

Ajo pohoi se kalimi në ushqyerjen me lugë në muajin e gjashtë lidhet drejtpërdrejt edhe me zhvillimin e të folurës së fëmijës.

“Gjiri sa ç’është i mirë dhe ta mbyll gojën. Varësitë fillojnë nga ushqyerja me gji. Prandaj duhet shkëputur në një vjeç, ja do ta çosh deri në dy vjeç, jo më shumë. Fëmija duhet shkëputur kur nëna ndihet e lodhur. Ka teknika, nuk mund ta heqësh menjëherë. Duhet hequr gjiri, të hapet goja që të flasë.”

Sipas pediatres, në 1000 ditët e para të jetës së një fëmije ndërtohet një pjesë e madhe e bazës së zhvillimit të tij, e cila do të ndikojë gjatë gjithë jetës.

/tvklan.al

Parashikuesit europianë të motit kanë lëshuar një paralajmërim për mot të ashpër në një pjesë të madhe të Europës, duke ngritur Nivelin 2 të rrezikut për Italinë juglindore, Detin Jon dhe zonat përreth, për shkak të mundësisë për breshër të madh deri shumë të madh, erëra shkatërruese, reshje intensive, si edhe tornado të izoluara, veçanërisht në zonat bregdetare.

Sipas parashikimit, gjatë mbrëmjes dhe natës pritet që një sistem i fuqishëm stuhish të zhvillohet mbi Italinë Qendrore dhe Adriatik, për t’u zhvendosur më pas drejt jugut. Ky sistem pritet të prekë rajonin e Pulias dhe më pas brigjet lindore të Detit Jon, duke përfshirë edhe brigjet jugperëndimore të Shqipërisë dhe perëndimin e Greqisë.

Meteorologët paralajmërojnë se në këto zona mund të regjistrohen erëra me intensitet shkatërrues, breshër shumë i madh, reshje të dendura dhe, në raste të izoluara, edhe tornado. Sipas tyre, nëse një superqelizë stuhie kalon pranë bregdetit, ekziston mundësia e formimit të një tornadoje të fortë.

Ndërkohë, Niveli 1 i rrezikut është shpallur për Slloveninë dhe Kroacinë, ku priten breshër, erëra të forta dhe reshje intensive. I njëjti nivel paralajmërimi vlen edhe për Italinë verilindore dhe Adriatikun verior, ku nuk përjashtohet mundësia e tornadove të izoluara në zonat bregdetare.

Paralajmërime për stuhi janë lëshuar gjithashtu për pjesë të Spanjës lindore, ku pritet breshër i madh dhe erëra të forta, si edhe për Rusinë jugperëndimore.

Sipas sinoptikanëve, situata atmosferike në Europë mbetet e favorshme për zhvillimin e fenomeneve ekstreme, për shkak të ndërveprimit mes masave të nxehta dhe shumë të lagështa të ajrit me një luginë të thellë atmosferike që po lëviz nga Europa Qendrore drejt Mesdheut.

Në zonën e Detit Jon, temperaturat e sipërfaqes së detit janë rreth 4–5 gradë Celsius mbi normalen, duke krijuar kushte ideale për zhvillimin e stuhive të fuqishme. Parashikuesit theksojnë se monitorimi i situatës në kohë reale do të jetë vendimtar, pasi vendndodhja dhe intensiteti i stuhive mund të ndryshojnë me shpejtësi.

Nëna e tre fëmijëve, Dorina Sejdini, u lirua nga burgu i Pojskës. Vendimi u dha nga gjyqtari Edvan Velçani, i cili, në mungesë të 34-vjeçares, që nuk ishte e pranishme, shqyrtoi me urgjencë kërkesën e 34-vjeçares për rivendosje në afat, që do të thotë pezullim i arrestimit të saj, e po ashtu zhbërje e dënimit me burg prej dy muajsh.

Kjo do të thotë gjithashtu se gruaja e akuzuar për dhunë në familje dhe e dënuar me dy muaj burgim nga Shkalla e Parë e kryeqytetit konsiderohet, pas vendimit të gjyqtarit Velçani, pa vendim të formës së prerë, e njëherazi në pritje për t’u gjykuar nga Apeli i Tiranës.

Gruaja, nënë e tre fëmijëve, katër, dy vjeç dhe i treti 7 muajsh, u arrestua sapo u kthye nga Gjermania. Por çështja e saj u bë publike pas dërgimit të Sejdinit në burgun e Pojskës dhe kërkesave të saj që t’i ribashkoheshin në qeli edhe fëmijët. Për këtë arsye, foshnja 7-muajshe iu dorëzua menjëherë në burgun e Pojskës, duke sjellë akomodimin e gruas në një ambient të posaçëm për të dënuarat, nëna me fëmijë të mitur.

Rasti i raportuar në Top Channel për mënyrën se si ishte ekzekutuar vendimi nga autoritetet u bë shkak që Avokati i Popullit, me dy komisionerë, të verifikojë kushtet dhe procedurat e burgosjes së saj. Endri Shabani deklaroi se, nëse gruaja nuk lirohej, do të kishte shkelje të procedurave. Po ashtu, për prangosjen e Sejdinit reagoi edhe Presidenti i Republikës, i cili kërkoi propozim nga Ministria e Drejtësisë për t’i dhënë faljen, nëse rezulton se ajo nuk është përfituese e amnistisë penale të vitit 2026.

Top Channel

Opozita bllokoi foltoren gjatë punimeve të Kuvendit.

Kjo ndodhi menjëherë pasi kryetari Niko Peleshi deklaroi fundin e fjalës për procedurë dhe nisjen e prezantimit të raporteve përkatëse të PS e PD për reformën territoriale.

Pasi situata u tensionua, Peleshi kërkoi sërish 5 minuta pushim për t’iu rikthyer normalitetit.

Disa minuta më pas seanca u rikthye dhe nisën diskutimet… por nuk zgjatën shumë. Sërish foltorja është bllokuar, duke çuar edhe një herë në pushim.

Pas 5 minutash pushimi seanca ka rinisur, por ende Boçi nuk liron foltoren që fjalën ta marrë Arbian Mazniku.