Aeroporti i Rinasit është shndërruar në një nga portat më të frekuentuara të vendit, sidomos gjatë sezonit turistik. Çdo ditë në aeroport përpunohen nga 50 deri në 56 mijë pasagjerë.

Për të përballuar këtë fluks, Policia Kufitare ka kaluar në shërbim 12-orësh, duke shtuar me rreth 20 për qind numrin e efektivëve në terren. Paralelisht, janë marrë masa për përshpejtimin e procedurave, përmes zgjerimit të përdorimit të sistemit e-Gate dhe modernizimit të pajisjeve të kontrollit kufitar.

Sipas Policisë së Shtetit, ulja e moshës minimale për përdorimin e e-Gate nga 16 në 12 vjeç, përmirësimi i sistemit TIMS dhe zëvendësimi i pajisjeve të kontrollit kanë ndikuar në shkurtimin e kohës së pritjes dhe rritjen e kapaciteteve të përpunimit të pasagjerëve.

Por, krahas lehtësimit të lëvizjes, vëmendja mbetet e përqendruar edhe te siguria kufitare. Kontrollet bazohen në analizën e riskut, me fokus goditjen e trafikut të lëndëve narkotike, kontrabandës dhe migracionit të paligjshëm.

Sipas Policisë së Shtetit, bashkëpunimi mes institucioneve ka mundësuar menaxhimin e fluksit të lartë të udhëtarëve, duke ruajtur njëkohësisht standardet e sigurisë dhe shpejtësinë e shërbimit.

Ballkani pritet të përballet me një nga episodet më të fuqishme të motit ekstrem të kësaj vere.

Qendra Evropiane për Parashikimin e Stuhive ka lëshuar nivelin më të lartë të alarmit (Niveli 3) për një pjesë të rajonit, duke paralajmëruar stuhi të rrezikshme që do të zhvillohen nga e marta deri në orët e para të së mërkurës.

Sipas parashikimit, zonat më të rrezikuara janë jugu i Kroacisë, jugu i Bosnjë-Hercegovinës, Mali i Zi dhe Kosova, ndërsa Shqipëria përfshihet në zonën e Nivelit 1 të rrezikut, ku priten fenomene të ngjashme, por me shtrirje më të kufizuar. Meteorologët paralajmërojnë se situata mund të shndërrohet në një shpërthim të madh stuhish të fuqishme që do të përhapet nga Italia drejt Evropës Juglindore.

Parashikohen superqeliza afatgjata dhe sisteme stuhish të organizuara, të afta të prodhojnë breshër shumë të madh, erëra me intensitet shkatërrues dhe, në raste të izoluara, tornado. Për Ballkanin Perëndimor, përfshirë Kroacinë, Bosnjën, Malin e Zi, Serbinë jugore dhe Shqipërinë, vlerësohet se kushtet atmosferike favorizojnë zhvillimin e stuhive shumë të forta. Sipas analizës, ekziston mundësia që sisteme të fuqishme stuhish të formuara mbi Itali të kalojnë Adriatikun dhe të godasin rajonin, duke sjellë erëra me forcë uragani, breshër të madh dhe reshje intensive. Parashikimi thekson se stuhitë mund të vazhdojnë deri në orët e vona të mbrëmjes dhe gjatë natës, me disa valë të njëpasnjëshme fenomenesh ekstreme.

Përveç Ballkanit, niveli 2 i alarmit është shpallur për pjesë të Italisë, Rumanisë dhe Bullgarisë, ndërsa alarme të nivelit 1 janë lëshuar për rajone të tjera të Evropës. U bëhet thirrje autoriteteve dhe qytetarëve në Ballkan të ndjekin me kujdes paralajmërimet, pasi kombinimi i breshrit gjigant, erërave shkatërruese dhe mundësisë për tornado mund të shkaktojë dëme të konsiderueshme.

Top Channel

Një turiste rreth 30 vjeçe nga Finlanda ka humbur jetën pasi u ndje keq gjatë një zhytjeje në zonën e Radhimës, në zonën e spitalieres.

Sipas informacioneve paraprake, e reja ishte pjesë e një grupi zhytësish kur gjatë zhytjes pësoi komplikacione serioze shëndetësore.

Burime spitalore bëjnë me dije se 30-vjeçarja mbërriti në gjendje shumë të rëndë, me vështirësi në frymëmarrje dhe shenja të një komplikacioni serioz. Pavarësisht përpjekjeve të mjekëve, ajo nuk arriti të mbijetojë dhe ndërroi jetë pak pasi mbërriti në spital.

Autoritetet kanë nisur veprimet procedurale për zbardhjen e plotë të rrethanave të ngjarjes, ndërsa ekspertiza mjeko-ligjore pritet të përcaktojë shkakun e saktë të vdekjes.

Deputeti i Partisë Demokratike, Saimir Korreshi, ka lëshuar batuta dhe ironi gjatë mbledhjes së Komisionit të Ligjeve në drejtim të qeverisë, duke e vënë në shënjestër koncertin e paralajmëruar të këngëtarit me famë botërore Kanye West, për të cilin u dhanë 4.2 milionë euro nga fondet publike.

Duke u ndalur te ky financim i bujshëm, Korreshi ka bërë humor me ministrin ose kolegët socialistë në sallë, veçanërisht me Ulsi Manjën, duke ngritur pyetje ironike se ku përfunduan biletat e këtij koncerti.

Në vijim të fjalës së tij, deputeti i Lushnjës krahasoi shifrat e koncertit ndërkombëtar me ato të artistëve vendas, duke theksuar se me një fraksion të asaj shume mund të kënaqej e gjithë Myzeqeja.

Korreshi: Pse në nuk na ka lënë partia? Ne nuk na la partia, na i grisi biletat. Po kjo ministria ka sjell ca bileta për ne? Apo ishin vetëm për PS?! Me the ti që nuk ju la partia.

Manja: Qejf e ke pasur të shkojë në koncert, thuaja ehe këtë.

Korreshi: Tani ky ishte kaq i mirë sa e njoha tani që do merrte 4.2 mln euro. Fshatar jam. Unë jam te Luan Zhegu ende. Ti je modern, kërceve upsi-dupsi. Ne duam def. Si u ndanë këto para? U hap porta, deti, si në 2 korrik. Ku shkuan këto bileta? Nuk e qëllojmë dot. Atje nga Lushnja duam 2 mln lekë të vjetra, këndon gjithë Myzeqeja. Ca e quajnë atë këngëtarin? Kanye West.

Kryeministri Edi Rama reagoi sot ndaj kritikave dhe kërkesave për shfuqizimin e Paketës së Maleve duke theksuar se nisma synon t’u japë mundësi banorëve të zonave malore të zhvillojnë pronat e tyre dhe të tërheqin investime.

Gjatë një bashkëbisedimi online me qytetarët, Rama u shpreh se Paketa e Maleve nuk parashikon shitjen e maleve, por krijon mundësi për ata që kanë trashëguar prona ose që prej vitesh mirëmbajnë pemëtore e sipërfaqe bujqësore, por nuk kanë mundur të pajisen me dokumentacionin përkatës.

“Këtu nuk jemi në kushtet ku shiten malet. Këtu jemi në kushtet kur malet po hapen për ata që në male kanë trashëguar një pronë”, tha Rama.

Sipas tij, paketa u krijon mundësi qytetarëve të pajisen me leje për aktivitete agropërpunimi dhe investime në turizëm, duke e kthyer pronën në një aset ekonomik.

Kryeministri theksoi se mijëra emigrantë kanë shprehur interes për të investuar në zonat malore dhe se turizmi do të ketë një rol gjithnjë e më të rëndësishëm në ekonominë e vendit.

Ai shtoi se Paketa e Maleve është rezultat i konsultimeve dhe përpjekjeve të gjata me komunitetet lokale, duke kundërshtuar pretendimet se ajo cenon pronësinë.

“Nuk kam parë ndonjë komunitet që preket nga kjo paketë të thotë se po i merren pronat. Ata mezi e presin”, u shpreh Rama.

Duke iu përgjigjur një komentuesi në rrjetet sociale që shkruante “Zvicra e vogël do bëhet, se s’bën”, Rama tha se zhvillimi i zonave malore arrihet duke u krijuar mundësi banorëve të investojnë në harmoni me natyrën.

“Bëhet pikërisht duke u dhënë mundësi njerëzve që të investojnë në harmoni me natyrën dhe të krijojnë mirëqenie pa qenë të detyruar t’i braktisin ato male”, deklaroi ai.

Rama komentoi edhe kritikat dhe komentet në rrjetet sociale, duke u shprehur se ato nuk ndikojnë tek ai, por, sipas tij, “i bëhen shëndet e forcë”.

E trishtë! Një aksident i rëndë ka ndodhur ditën e sotme në Vlorë. Si pasojë e aksidentit ka ndërruar jetë gazetari i News24, Enrik Mehmeti.

Mehmeti ka humbur jetën në moshën 40-vjeçare, pas aksidetit me motor në plazhin e Porto Novës, në Zvërnec, ndërsa grupi hetimor po punon për zbardhjen e plotë të rrethanave të aksidentit.

Gazetari Enrik Mehmeti ka raportuar ngjarjet nga qarku i Vlorës. Për vite me radhë, Mehmeti ishte fytyra dhe zëri që solli në ekranin e News24 ngjarjet më të rëndësishme të jugut të vendit, nga kronika e zezë te operacionet policore, zhvillimet sociale, politike dhe turistike. Ai njihej për praninë e menjëhershme në vendngjarje, raportimet ekskluzive dhe këmbënguljen për të sjellë informacionin e verifikuar, edhe në situata të vështira.

Ikja e parakohshme e kolegut Enrik Mehmeti është një humbje e madhe për familjen, miqtë dhe komunitetin e gazetarëve.

Enrik Mehmeti la pas bashkëshorten dhe 2 fëmijët.