Qendra Sociale Murialdo njofton hapjen e regjistrimeve për kurset profesionale për vitin e ri akademik 2026–2027, duke u ofruar të rinjve dhe të rriturve një mundësi konkrete për t’u formuar profesionalisht dhe për t’u përgatitur për tregun e punës.

Prej vitesh, Qendra Sociale Murialdo është një hapësirë e rëndësishme formimi, edukimi dhe mbështetjeje për komunitetin, duke i dhënë rëndësi të veçantë zhvillimit të aftësive praktike dhe përgatitjes së profesionistëve të rinj. Edhe këtë vit, qendra vjen me një ofertë të larmishme kursesh profesionale, të përshtatura me nevojat aktuale të tregut të punës.

Në Qendrën e Formimit Profesional, kursantët do të gjejnë një ambient komod, modern dhe të pajisur me laboratorë e kushte bashkëkohore. Procesi mësimor ndërthur njohuritë teorike me praktikën konkrete, duke u mundësuar pjesëmarrësve të fitojnë aftësi reale dhe të përdorshme në profesionin që zgjedhin.

Kurset zhvillohen nga mësues me eksperiencë, të cilët i shoqërojnë kursantët hap pas hapi gjatë gjithë procesit të formimit. Vëmendje e veçantë i kushtohet praktikave të sigurta, rregullave të punës, disiplinës, sigurisë në laboratorë dhe përgatitjes së kursantëve për t’u përballur me përgjegjësi me realitetin profesional.

Qëllimi i këtyre kurseve nuk është vetëm dhënia e një certifikate, por formimi i profesionistëve të aftë, të përgjegjshëm dhe të gatshëm për t’u integruar në tregun e punës. Përmes kushteve moderne, metodave praktike dhe përkujdesjes së stafit, çdo kursant ka mundësinë të ndërtojë një rrugë të re profesionale dhe të investojë në të ardhmen e tij.

Kurset profesionale që ofrohen për vitin akademik 2026–2027 janë: Asistent Zyre, Menaxhim Zyre, Elektroauto, Hidraulik, Elektricist për instalime elektrike civile, Elektricist për instalime elektrike industriale, Mekanik, Kuzhinë dhe Pastiçeri.

Regjistrimet janë të hapura për të gjithë ata që dëshirojnë të mësojnë një profesion, të zhvillojnë aftësitë e tyre ose të krijojnë mundësi më të mira punësimi.

Të dhënat e kontaktit:
Qendra Sociale Murialdo
L. Sheq i Vogël, Fier
Tel: 069 528 8909
Email: sekretaria.qsm@murialdo.org
Facebook/Instagram: Qendra Sociale Murialdo

Kryeinspektori i Përgjithshëm, z. Dashnor Sula, ka zhvilluar një takim pune në Fier me strukturat inspektuese në nivel qarku.

Fokusi kryesor i këtij takimi ishte rritja e menjëhershme e efikasitetit në kontrollin e subjekteve ekonomike, me qëllim garantimin e standardeve më të larta në dy sektorë jetikë: sigurinë ushqimore dhe mbrojtjen e mjedisit.

Mes reagimeve që ka sjellë ngjarja e rëndë e dhunimit të një 17-vjeçareje në Fier, kanë folur edhe prindërit e njërës prej vajzave 15-vjeçare të përfshira në këtë rast.

Ata tregojnë se ngjarjen e kanë mësuar fillimisht përmes mediave dhe më pas janë shoqëruar në polici për të dhënë dëshminë e tyre.

Me lot në sy, nëna e 15-vjeçares i kërkon falje publike vajzës së dhunuar dhe familjes së saj, duke shprehur keqardhje të thellë për atë që ka ndodhur.

“Më mori policia, nuk di gjë. Ju kërkoj ndjesë prindërve të asaj goce. Sikur të më kishte ndodhur mua, do t’i kërkoja 100 herë ndjesë. Jam shumë e prekur, sikur t’ia kishin bërë fëmijës tim. Jam shumë e prekur. Po vajzën e kemi çuar për ta vizituar dhe është me probleme. Psikologia e shkollës e ka marrë, por s’ka bërë asgjë. Unë kërkoj shërim të plotë të gocës, sepse e kemi me probleme të shëndetit dhe me gjendje ekonomike nuk kam fare. Nuk e përballoj dot mjekimin. I kërkoj ndjesë familjes së vajzës dhe asaj vajze.”, u shpreh për Top Channel, e ëma e 15-vjeçares.

Prindërit bëjnë me dije se vajza e tyre është diagnostikuar 3 muaj me pare me probleme të shëndetit mendor dhe se prej kohësh kanë kërkuar ndihmë pranë institucioneve për trajtimin e saj.

Sipas tyre, ajo kishte shfaqur edhe më parë episode agresiviteti, por kërkesat për mbështetje nuk kanë marrë përgjigjen e nevojshme.

Përballë pamundësive ekonomike për të financuar trajtimin e specializuar, familja u bën thirrje institucioneve shtetërore që të ndërhyjnë dhe të ndihmojnë në kurimin e vajzës, me shpresën se ajo do të marrë kujdesin e nevojshëm mjekësor dhe psikologjik.

Prindërit theksojnë se nuk synojnë të justifikojnë veprimet e së bijës, por kërkojnë që, krahas përgjegjësisë ligjore për ngjarjen, të mos neglizhohet nevoja për trajtimin e problemeve të saj shëndetësore.

Drejtoria Vendore e Policisë Fier

Nisur nga sensibiliteti i lartë publik i krijuar pas publikimit në rrjetet sociale të videos së një ngjarjeje të ndodhur më datë 08.06.2026, si dhe pas reagimeve dhe interesit të madh të qytetarëve në drejtim të adresave zyrtare dhe rrjetet sociale të Policisë së Shtetit, Drejtoria Vendore e Policisë Fier e konsideron të nevojshme të risqarojë opinionin publik mbi masat e marra dhe veprimet e kryera nga strukturat e Policisë në lidhje me këtë rast, dhe më konkretisht:

Më datë 08.06.2026, një shtetase 17 vjeçe është paraqitur në Komisariatin e Policisë Fier, së bashku me nënën e saj, dhe ka kallëzuar se ishte dhunuar dhe filmuar në banesën e shtetases L. L., 19 vjeçe, nga kjo e fundit dhe dy shtetase të tjera 15-vjeçare.

Menjëherë pas kallëzimit të së miturës, strukturat e Drejtorisë Vendore të Policisë Fier kanë vlerësuar maksimalisht denoncimin dhe, në bashkëpunim me Prokurorinë, kanë kryer të gjitha veprimet procedurale dhe hetimore, në përputhje me parashikimet ligjore.

Në vijim të veprimeve hetimore, janë shoqëruar në ambientet e Komisariatit të Policisë shtetasja L. L., 19 vjeçe, si dhe 2 shtetaset e mitura 15-vjeçare, të cilat deklaruan se kishin ushtruar dhunë ndaj shoqes së tyre, shtetases së mitur 17 vjeçe, për motive të dobëta.

Në përfundim të veprimeve, më datë 09.06.2026, materialet procedurale i’u referuan Prokurorisë për veprën penale “Dëmtime të tjera me dashje”, në ngarkim të 3 shtetaseve të mësipërme.

Gjithashtu, sqarojmë se, më datë 28.06.2026, nga specialistët për Hetimin e Krimeve, në koordinim me Prokurorinë e Juridiksionit të Përgjithshëm Fier, është arrestuar njëra nga 15-vjeçaret e përfshira në dhunimin e 17-vjeçares. Arrestimi u bë pas kallëzimit të nënës së 15-vjeçares, e cila deklaroi se ishte dhunuar nga vajza e saj, duke i shkaktuar dëmtime fizike.

Pas procedurave përkatëse dhe bazuar në vlerësimin e autoriteteve kompetente, 15-vjeçarja e arrestuar është dërguar për trajtim në një institucion shëndetësor të specializuar për shëndetin mendor, në Tiranë.

Drejtoria Vendore e Policisë Fier rithekson se ka kryer të gjitha veprimet e nevojshme hetimore në përputhje me ligjin, në bashkëpunim të ngushtë me organin e Prokurorisë, i cili është autoriteti kompetent për vijimin e procedimit penal.

Policia e Shtetit mbetet maksimalisht e angazhuar për trajtimin me seriozitet të çdo rasti që cenon sigurinë e qytetarëve, veçanërisht kur në këto ngjarje përfshihen të mitur, duke vepruar me profesionalizëm, paanshmëri dhe në zbatim të plotë të ligjit.

Zjarri 9 orësh i përmasave të mëdha që përfshiu mesditën e së dieles zonën mes fshatrave Drizë dhe Peshtan në bashkinë Fier , la pas dëme te mëdha.

Një ditë më pas , banorët pohojnë se bilanci i dëmeve është i konsiderueshëm, në banesa, në mjete bujqësore, shpesë, vreshta , ullishte, por edhe në bazë ushqimore për bagëtitë.

Njëzëri ata pohojnë se kurrë më parë nuk kanë pare një zjarr të tillë në zonën e tyre, që të rrezikonte banesat dhe jetët e njerëzve, teksa shprehin mirënjohjen për ndërhyrjen e shpejtë të forcave të policisë, zjarrfikësve dhe helikopterëve të Forcave të Armatosura, te cilët bënë të mundur neutralizimin në kohë të flakëve.

Shumë prej banorëve të zonës kanë ardhur nga jashtë vendit të alarmuar, pasi janë informuar për situatën problematike të shkaktuar nga përhapja e flakëve.

Ndërkohë policia ka arrestuar autorin e dyshuar të zjarrvënies, 20 – vjeçarin Nikolla Jaso , banues në Drizë, i cili dyshohet se ka ndezur zjarr në tokën në pronësi të babait të tij për djegjen e disa barishteve, por flakët kanë dalë jashtë kontrollit, ndërsa banorët apelojnë për kujdes në ndezjen e pakontrolluar të zjarreve në këto ditë të nxehta.

Ndërkohë sipas të dhënave nga sektori i mbrojtjes pranë Prefekturës Fier, zjarri i djeshëm përshkoi rreth 110 hektarë sipërfaqe me shkurre dhe ullishte.

Ka përfunduar java e parë e kampit veror në Qendrën Sociale Murialdo në Fier, i cili ka sjellë shumë gëzim, emocione të bukura dhe buzëqeshje në fytyrat e fëmijëve.

Rreth 220 fëmijë të grupmoshave 5–14 vjeç janë përfshirë në aktivitete të larmishme, edukative, argëtuese dhe plot ngjyra.

Për mbarëvajtjen e kampit kujdesen rreth 40 animatorë të trajnuar, të cilët, me përkushtim, kreativitet dhe energji pozitive, krijojnë çdo ditë një atmosferë të ngrohtë, të sigurt dhe gjithëpërfshirëse për fëmijët.

Programi i kampit ndërthur aktivitete të ndryshme, si: trajtimin e temave sociale, krijimin e produkteve nga fëmijët mbi temat ditore, lojëra në grup, lojëra me ujë, kërcime, bans-a, piktura dhe aktivitete të tjera krijuese.

Në qendër të gjithë këtij programi qëndron një vlerë shumë e rëndësishme: gjithëpërfshirja.Ky kamp synon të krijojë një hapësirë ku çdo fëmijë të ndihet i pranuar, i vlerësuar dhe pjesë e grupit, duke përfshirë edhe fëmijë dhe grupe më vulnerabël të shoqërisë.

Përmes lojës, bashkëpunimit dhe edukimit, fëmijët mësojnë të respektojnë njëri-tjetrin, të ndajnë emocione, të krijojnë miqësi dhe të ndërtojnë kujtime të bukura.

Qendra Sociale Murialdo prej rreth 30 vitesh zhvillon aktivitete të tilla në shërbim të fëmijëve, të rinjve dhe komunitetit.

Megjithatë, ky vit është i veçantë për disa arsye: së pari, për numrin e lartë të fëmijëve pjesëmarrës; së dyti, për gjithëpërfshirjen e gjerë të grupeve të ndryshme të shoqërisë; dhe së treti, për rolin e rëndësishëm të animatorëve socialë të trajnuar.

Falë trajnimit të grupit të animatorëve socialë, Qendra Sociale Murialdo është ndër qendrat e para në qarkun e Fierit që trajnon të rinj në fushën e animimit social, duke krijuar aktivitete që ndërthurin traditën, metodat moderne dhe kreativitetin e të rinjve.

Kampi veror “Së bashku për gjithëpërfshirjen” është më shumë se një aktivitet veror. Ai është një rrugëtim drejt shpresës, një hapësirë ku fëmijët rriten me dashuri, mësojnë përmes lojës dhe përjetojnë gëzimin e të qenit së bashku.

Një falënderim i veçantë shkon për Qendrën Sociale Murialdo, animatorët, familjet dhe të gjithë ata që kontribuojnë për ta bërë këtë kamp një eksperiencë kaq të bukur dhe kuptimplotë për fëmijët e Fierit.

Një zjarr me përmasa të mëdha përfshiu këtë të shtunë zonën mes fshatrave Drizë dhe Peshtan, në njësitë administrative Qendër dhe Levan, në Bashkinë Fier. Flakët shpërthyen rreth orës 11:00 dhe, pas një operacioni intensiv që zgjati mbi nëntë orë, u vunë plotësisht nën kontroll në orën 20:20.

Sipas të dhënave zyrtare, zjarri përshkoi rreth 100–110 hektarë sipërfaqe me shkurre dhe ullishte, ndërsa shkaku i rënies së tij mbetet ende i panjohur.

Në operacion u angazhuan dy helikopterë dhe dy mjete zjarrfikëse të Forcave të Armatosura, 15 mjete zjarrfikëse nga disa bashki dhe institucione, katër autobote uji, 70 efektivë zjarrfikës, 35 ushtarakë, 40 punonjës të Policisë së Shtetit, pesë ekipe të urgjencës mjekësore, 15 punonjës të bashkisë, dy përfaqësues të Mbrojtjes Civile të Prefekturës si dhe rreth 30 banorë vullnetarë.

Falë ndërhyrjes së koordinuar nga ajri dhe toka, u shmangën dëmet në banesa, edhe pse flakët arritën deri në oborret e tyre, duke djegur vetëm bimësinë përreth, pa prekur strukturat e ndërtesave.

Për arsye sigurie, u evakuuan përkohësisht shtatë familje që banonin pranë zonës së rrezikuar. Nuk raportohen humbje jete apo persona të lënduar.

Gjatë natës, zona do të mbahet nën monitorim nga dy mjete zjarrfikëse të MZSH Fier dhe dy patrulla të Policisë së Shtetit, për të parandaluar çdo riaktivizim të mundshëm të vatrave.

Operacioni u koordinua dhe u ndoq nga afër në terren nga Prefekti i Qarkut Fier, nënkryetari i Bashkisë Fier, drejtori i Qendrës së Mbrojtjes Civile për Rajonin e Jugut, si dhe me praninë e deputetëve të zonës.

Instituti i Gjeoshkencave ka paralajmëruar se gjatë pasdites së sotme dhe ditës së nesërme në disa qarqe të vendit pritet rrezik i lartë për zjarre, për shkak të temperaturave të larta dhe kushteve të favorshme për përhapjen e flakëve.

Sipas parashikimit, niveli i rrezikut do të jetë “i lartë” në qarqet Lezhë, Durrës dhe Fier.

Ndërkohë, në qarqet Shkodër, Tiranë, Berat dhe Vlorë pritet nivel rreziku “i moderuar”, ndërsa në qarqet Kukës, Dibër, Elbasan, Korçë dhe Gjirokastër niveli i rrezikut do të jetë “i ulët”.

Instituti thekson se në disa zona të qarqeve Shkodër (jug), Tiranë (perëndim), Berat (perëndim) dhe Vlorë (veriperëndim), rreziku mund të arrijë lokalisht në nivel “të lartë”, ndërsa situata më kritike parashikohet gjatë ditës së nesërme.

Sa i përket kushteve atmosferike, nuk priten reshje as sot pasdite dhe as nesër.

Temperaturat nesër pritet të variojnë nga 21 deri në 31°C në zonat bregdetare, nga 19 deri në 34°C në zonat e ulëta dhe nga 13 deri në 27°C në zonat malore.

Era do të fryjë e lehtë deri mesatare, ndërsa herë pas here në zonat malore dhe përgjatë bregdetit pritet të jetë e fortë.