Janë zbardhur detaje të reja mbi gjendjen e të lënduarve nga aksidenti tragjik i ndodhur në autostradën Tiranë–Durrës.

Sipas njoftimit zyrtar, në Qendra Spitalore Universitare “Nënë Tereza” po marrin trajtim mjekësor 12 persona të plagosur, ndërsa 7 prej tyre ndodhen në gjendje të rëndë shëndetësore.

Mes të lënduarve raportohet se ndodhen edhe një fëmijë dhe një i mitur.

Autoritetet bëjnë me dije se një prej pasagjerëve ka mbërritur në spital pa shenja jete, duke e çuar në dy numrin e viktimave nga aksidenti i rëndë me autobusin e linjës Berat–Tiranë.

“Informacion mbi gjendjen e të lënduarve gjatë aksidentit në autostradën Tiranë – Durrës
Në SUT aktualisht ka 12 persona të lënduar, 7 prej tyre në gjendje të rëndë shëndetësore. (Përfshirë dhe një fëmijë e një i mitur)
Një prej pasagjerëve ka mbërritur në spital pa shenja jete”, thuhet në njoftim.

Pensionistët do të përfitojnë një bonus vere me vlerë 5000 lekë, njoftoi ministrja e Ekonomisë, Delina Ibrahimaj pas mbledhjes së qeverisë. Nga dita e nesërme nis shpërndarja e tij.

“Vendosëm të akordojmë një bonus për pensionistët, do të jetë bonusi i verës me vlerë 5000 lekë. Janë mbi 777 mijë pensionistë që do të përfitojnë nga ky bonus, persona me statusin e invaliditetit. Efekti financiar i këtij bonusi është rreth 3.7 miliardë lekë. Do të vazhdojmë të kemi vëmendje të shtuar për të ardhurat e pensionistëve. Ky bonus jepet për herë të parë në mes të vitit. Ai do të nisë të shpërndahet nga dita e nesërme. Bonusi i shtohet bonusit që pensionistët janë duke marrë që nga janari”, tha ministrja.

Gjithashtu është rritur masa e garancisë sovrane për bizneset.

“Rritet masa e garancisë sovrane për mbështetjen e bizneseve. Ky vendim lidhet me programin “Dyfisho sipërmarrjen tënde” që u dedikohet gjithë bizneseve në Republikën e Shqipërisë. Norma e interesit që do të aplikohet nga bankat do të jetë mesatarisht 2%”, tha Ibrahimaj.

Kreu i qeverisë, Edi Rama, ishte i pranishëm këtë të martë 30 qershor, në Vlorë, ku dhe u nënshkrua Memorandumi i Bashkëpunimit mes gjigandit italian të industrisë detare FINCANTIERI, kompanisë shtetërore KAYO dhe Shkollës Industriale “Pavarësia”, për prodhimin e mjeteve detare në Pashaliman.

Qëllimi i këtij memorandumi është zhvillimi i praktikave profesionale dhe mundësia e punësimit në fushën e ndërtimit dhe industrisë detare.

Fjalën e mbajti fillimisht kreu i KAYO-s, Ardi Veliu. Ai u shpreh se partneriteti strategjik do të krijojë mundësi të reja për zhvillimin e industrisë ushtarake dhe forcimin e kapaciteteve profesionale, duke ndërtuar një bazë të qëndrueshme për rritjen e aktivitetit.

“Një partneritet strategjik që jep mundësi të reja për zhvillimin e industrisë ushtarake dhe jo vetëm, ngritjen e kapaciteteve profesionale përmes këtij bashkëpunimi ne do ndërtojmë një bazë të qëndrueshme për rritjen e aktivitetit tonë, duke krijuar siguri dhe vazhdimësi në punë, për projekte afatgjata që do gjenerojnë të ardhura të qëndrueshme dhe do sigurojnë rolin e KAYO-s si një aktor i rëndësishëm në industrinë shqiptare”, u shpreh Veliu.

Rama u shpreh se qeveria do të miratojë një akt normativ për të rritur financimin e mbrojtjes, duke synuar 2.6% të buxhetit të shtetit, në përputhje me objektivat e NATO-s. Ai theksoi se përfitues do të jenë strukturat e Ministrisë së Mbrojtjes dhe Forcat e Armatosura, si dhe të gjitha hallkat që i bashkohen këtij procesi rritjeje.

“Ne jemi sot në një ditë kur pas këtij takimi, qeveria shqiptare do të miratojë një akt normativ, ndër të tjera Shqipëria do të angazhojë të gjithë financimin e nevojshëm për të arritur targetin e përcaktuar nga anëtarësia jonë në NATO, që e çon në 2.6% të buxhetit të përgjithshëm të shtetit shpenzimin tonë për mbrojtje, ku përfituesit drejtpërdrejtë janë të gjithë ata që janë pjesë e strukturës sonë të Ministrisë së Mbrojtjes, FA, por edhe të gjithë ata që i bashkohen hap pas hapi kësaj rritjeje të jashtëzakonshme”, tha Rama.

Ai gjithashtu theksoi se nga ky partneritet do të krijohen 500 vende pune, në kuadër të sistemit të ri që po ndërtohet në fushën e mbrojtjes.

“Janë 500 vende pune që krijohen në këtë territor, nga ky partneritet dhe siç e tha administratori i përgjithshëm, janë 500 vende pune që kërkojnë njerëz të kualifikuar, ekspertizë, të mirëpaguara, në këtë sistem të ri që po ndërtohet. Duhet pasur parasysh që të gjithë ata që do përfshihen në këtë sipërmarrje, nuk do jenë thjesht njerëz që zotërojnë një zanat, por që do të shikohen edhe nga ana e figurës, sepse do të jenë pjesë e sistemit të mbrojtjes së Shqipërisë”, shtoi ai.

Projekti synon të rrisë kapacitetet ushtarake të Shqipërisë dhe të krijojë mjete detare si për Forcat e Armatosura shqiptare, ashtu edhe për aleatët.

Investimi, që pritet të sjellë rreth 500 vende pune, do të jetë me fokus te të rinjtë dhe të diplomuarit e shkollave profesionale.

Kryetari i Partisë Demokratike, Sali Berisha, reagoi pas përplasjeve mes policisë dhe protestuesve para Kuvendit, duke e cilësuar si “dhunë të egër shtazore” nga ana e Policisë së Shtetit ndaj qytetarëve që morën pjesë në protestë.

Përmes një deklarate, Berisha e konsideroi të papranueshme përdorimin e forcës ndaj protestuesve, ndërsa akuzoi qeverinë se po përpiqet të shtypë zërin e qytetarëve në vend që t’u përgjigjet kërkesave të tyre.

Sipas tij, përdorimi i dhunës ndaj protestuesve paqësorë dhe ndalimi i tyre janë tregues të frikës dhe arrogancës së pushtetit.

“Egërsi shtazore! Dënoj me ashpërsinë më të madhe dhunën dhe arrogancën e Policisë së Shtetit ndaj qytetarëve që protestojnë. Është e papranueshme që, ndërsa në Parlament shërbëtorët e Edi Ramës përpiqen të zhvlerësojnë protestën madhështore të shqiptarëve, në rrugë dërgojnë policinë për t’i dhunuar ata që kërkojnë të dëgjohen.

“Kur një qeveri nuk i përgjigjet qytetarëve me argumente, por me forcë, ajo tregon frikë, jo fuqi. Dhuna ndaj protestuesve paqësorë dhe përpjekjet për të heshtur zërin e tyre janë shenja të qarta të arrogancës së pushtetit dhe të një regjimi që po humbet legjitimitetin në sytë e qytetarëve”, tha Berisha.

Gjithashtu ai kërkoi lirimin e menjëhershëm të protestuesve.

Pas disa orësh në komisariat, Dritan Goxhaj dhe një protestues tjetër janë lënë të lirë.

Ata janë pritur nga një numër qytetarësh që ndodheshin jashtë ambienteve të Komisariatit nr. 1.

Ndërkohë, në komisariat ndodhen edhe disa protestues të tjerë, të cilët u shoqëruan pas tensioneve jashtë sallës së Kuvendit.

Një grup protestuesish janë mbledhur ditën e sotme përpara godinës së Kuvendit, ndërsa po mbahet seanca plenare.

Me pankarta në duar dhe thirrjet “Opozitë e shitur”, “Ju erdhi fundi”, “Rama, jep dorëheqjen” protestuesit janë grumbulluar përpara Parlamentit.

Protesta e sotme u paralajmëruar ditën e djeshme, nga organizatorët që bënë thirrje për grumbullim të qytetarëve para Parlamentit dhe seancës plenare.

Deputetët e Partisë Socialiste kanë mbërritur në Kuvend rreth 30 minuta përpara nisjes së seancës, për shkak të protestës së njoftuar jashtë godinës.

Pasi kanë qëndruar aty për rreth një orë, protestuesit u zhvendosën nga pjesa anësore e godinës së Kuvendit drejt pjesës qendrore. Ata kanë zhvendosur aty edhe një kosh mbeturinash, ndërsa përsërisin thirrjet: “Rama në kosh, Berisha në kosh”.

Përpara ambienteve të Kuvendit, disa protestues kanë shkruar në trotuar në shenjë simbolizuese “Parlament i krimit”.

Po ashtu, protesta e qytetarëve është shoqëruar me tensione. Protestuesit kanë hedhur vezë në drejtim të automjeteve në perimetrin e brendshëm të Kuvendit. Ata janë ndaluar nga forcat e policisë, të cilat kanë vendosur kordon sigurie dhe nuk kanë lejuar hyrjen e tyre në ambientet e brendshme të Kuvendit.

Ndërkohë, studentët kanë zgjedhur një tjetër mënyrë për të protestuar. Ata kanë një thirrje edhe për policinë, për të cilën theksojnë se veprojnë me dy standarde.

“Jemi kundër dy standardeve. Nuk duhet të procedohen studentët, ndërsa makinat bllokojnë rrugët e Tiranës, bllokojnë trafikun. Jemi në protestë dhe i kemi të qarta kërkesat. Gjoba deputetëve dhe mos procedoni studentët”, ishin thirrjet e studentëve.

Policia ka kërkuar lirimin e rrugës, ndërkohë që protestuesit nuk kanë pranuar.

“Nuk ua lirojmë rrugën hajdutëve dhe analfabetëve. Kjo është tokë publike, e jona, nuk e lirojmë”, tha një prej tyre.

Për shkak të tensioneve të krijuara dhe përplasjeve me policinë, janë kërkuar përforcime, ku kanë mbërritur Forcat e Ndërhyrjes së Shpejtë për të hapur rrugën.

Situata para Parlamentit është përshkallëzuar, pasi protestuesit kanë bllokuar të dyja hyrjet e Parlamentit. Gjatë tensioneve, policia ka shoqëruar Dritan Goxhajn, si edhe pesë persona të tjerë. Gjithashtu gjatë përplasjeve nga radhët e policisë janë lënduar katër punonjës policie të Forcës së Posaçme Shqiponjat dhe të Patrullës së Përgjithshme.

Pas këtij momenti protestuesit i janë drejtuar Drejtorisë Vendore të Policisë së Tiranës, nga ku kërkuan lirimin e të shoqëruarve. Në Drejtorinë Vendore të Policisë së Tiranës janë paraqitur dhe deputetët e Partisë Mundësia, Agron Shehaj dhe Erald Kapri. Shehaj pasi ka diskutuar me drejtues të Policisë së Tiranës, bëri të ditur se janë gjashtë të shoqëruar, të cilët janë të ndarë në tre komisariate.

Ndërkohë drejt komisariatit numër një është paraqitur edhe Avokati i Popullit, Endri Shabani.

Një aksident tragjik rrugor është regjistruar në autostradën Tiranë-Durrës, pranë QTU-së, ku është përmbysur një furgon i linjës së Beratit dhe kanë humbur jetën dy persona.

Dyshohet se shoferi ka pësuar një përgjumje ose një infarkt.

Ndërkohë, mësohet se 14 persona kanë mbetur të plagosur, ndërsa mes tyre është edhe një fëmijë në gjendje të rëndë.

Në vendngjarje kanë mbërritur forcat e policisë, ekipet e zjarrfikëses dhe autoambulancat, të cilat po punojnë për t’u dhënë ndihmën e parë të lënduarve dhe për nxjerrjen e pasagjerëve nga autobusi.