Agjencia për Zhvillim Bujqësor dhe Rural (AZHBR) ka zbardhur detajet e Skemës Kombëtare 2026 për mbështetjen e blegtorisë, me fokus tufën bazë të matrikulluar të të imtave (dele dhe dhi).

Sipas njoftimit zyrtar, këtë vit mbështetja financiare nis për fermat që disponojnë të paktën 50 krerë të matrikulluar.

Vlera e financimit për fermerët është:

1500 lekë për krerë për fermat me 50 deri në 300 krerë

50% financim mbi tavanin për fermat që tejkalojnë 300 krerë

100% mbështetje për Shoqëritë e Bashkëpunimit Bujqësor

AZHBR bën me dije se aplikuesit mund të konsultojnë udhëzimin e plotë të publikuar në faqen zyrtare, ku janë të detajuara kriteret dhe procedurat e përfitimit.

Gjithashtu, fermerët mund të marrin asistencë pranë Agropikave dhe Agjencive Rajonale të Ekstensionit Bujqësor, ndërsa për informacion shtesë është vënë në dispozicion edhe numri i kontaktit 0800 83 83.

AZHBR bën të ditur se, skema synon të rrisë mbështetjen për fermat blegtorale dhe të forcojë prodhimin vendas përmes formalizimit dhe zgjerimit të tufave të matrikulluara.

Çmimet e reja të Bordit të Transparencës futen në fuqi nga sot në orën 13:30.

Nafta ulet me 5 lekë, ndërsa benzina ulet me 3 lekë.

Prej orës 13:30, nafta do të tregohet me 190 lekë për litër, 5 lekë më pak se mbledhja e fundit e bordit.

Ndërkohë, çmimi i benzinës është caktuar 179 lekë/litër, 3 lekë më pak se vendimi i fundit i bordit.

Këto çmime do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.

Njoftim për Shtyp

Bordi i Transparencës në datë 27 Maj 2026, në mbledhjen e radhës vendosi:

Çmimi i shitjes me pakicë i nënproduktit gazoil i standardit SSH EN 590 të jetë jo më shumë se 190 lekë/litri, ndërsa i shitjes me shumicë jo më shumë se 178 lekë/litër.

Çmimi i shitjes me pakicë i nënproduktit benzinë e standardit SSH EN  të  jetë jo më shumë se 179 lekë/litri, ndërsa i shitjes me shumicë jo më shumë se 167 lekë/litër.

Çmimet e caktuara nga Bordi do të hynë në fuqi sot datë 27 ora 13.30 dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.

Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi.

Në rast të shkeljeve të konstatuara nga operatorë të ndryshëm do të vendoset pezullimi i aktivitetit.

Ministria e Ekonomisë dhe Inovacionit sëbashku me Ministrinë e Financave dhe Ministrinë e Infrastrukturës dhe Energjisë  janë angazhuar të mbrojnë interesat e konsumatorëve shqiptarë dhe ruajtjes së parimeve të konkurrencës së ndershme në treg.

SQARIM:

Referuar Aktit Normativ nr. 1, Datë 3.4.2026 “Për një shtesë në ligjin nr. 61/2012, “Për akcizat në Republikën e Shqipërisë,” të ndryshuar, ku është parashikuar, se në rast se çmimi i shitjes me pakicë, për gazoili është më i lartë se 220 lek/litri, apo për benzinën është më i lartë se 200 lek/litri, zbatohet niveli 80% i akcizës. Bazuar në zbatimin e metodologjisë për llogaritjen e çmimeve tavan te shitjes me pakice, çmimet janë nën kufirin e Aktit Normativ nr. 1, datë 3.4.2026, dhe për rrjedhojë niveli i akcizës do të zbatohet i plotë, 100%.

Shqiptarja.com

Studentë nga Universiteti i Tiranës dhe Universiteti i Prishtinës u grumbulluan këtë të hënë në sheshin “Skënderbej” në Tiranë për të protestuar në mbështetje të studentëve shqiptarë në Maqedoninë e Veriut, të cilët kërkojnë zhvillimin e provimeve në gjuhën shqipe.

Me moton “Shqiptaria është me Shkupin”, protestuesit nisën marshimin drejt ambasadës së Maqedonisë së Veriut në Tiranë, duke mbajtur flamuj kombëtarë, pankarta dhe banderola me mbishkrimin “Ne jemi bashkë”.

Në nisje të protestës u këndua himni kombëtar dhe u dëgjuan thirrje si “Gjuha shqipe, gjuha jonë”, “Duam shqipen zyrtare” dhe “O sa mirë me qenë shqiptar!”.

Protestuesit kënduan gjithashtu këngën “Mora fjalë” të Shkurte Fejzës.

Studentët deklaruan se protesta nuk ka karakter politik dhe kërkuan që të mos përdoret për qëllime partiake.

Ata theksuan se kërkojnë vetëm respektimin e të drejtës për përdorimin e gjuhës shqipe në proceset akademike në Maqedoninë e Veriut.

Një student nga Maqedonia e Veriut, gjatë fjalës së tij në protestë, u shpreh se kërkesa e tyre lidhet me barazinë dhe dinjitetin.

“Ne nuk kërkojmë privilegje, por barazi dhe respekt për gjuhën tonë. Gjuha shqipe është identiteti ynë dhe amaneti i brezave”, deklaroi ai.

Në protestë morën pjesë studentë nga Shqipëria, Kosova dhe Maqedonia e Veriut.