Pas arrestimit të një edukatoreje në një kopsht privat në Tiranë të akuzuar se ka dhunuar një dyvjeçar, media mëson detaje nga ngjarja.

Gjithçka ka ndodhur në kopshtin privat në rrugën rr. Aleksandër Mojsiu, vila 18/3, ish-Kinostudio. Fëmija dyvjeçar kur është marrë nga prindërit nga kopshti në shtëpi kanë vënë re se kishte të nxira në faqe. Më pas e kanë çuar në spital për ta parë nga se është shkaktuar dhe fillimisht kanë menduar se është ndonjë zënkë mes fëmijësh.

Më pas policia ka bërë këqyrjen e kamerave të kopshtit dhe ka zbuluar se në një moment kur fëmija 2-vjeç ka qenë duke qarë, edukatorja 32-vjeçare është afruar dhe e ka qëlluar dy herë shuplakë në faqe.

Pas këqyrjes së kamerave policia menjëherë ka bërë arrestimin e edukatores 32-vjeçare, e cila kishte punuar me të njëjtin profesion edhe jashtë vendit. Madje nga një verifikim në faqet në Instagram dhe Facebook të kopshtit, shihet që i kanë mbyllur të dyja pas ngjarjes.

Nëna e 24 vjeçares të Bleona Çelaj e cila u dogj bashkë me dy fëmijët ka deklaruar për policinë e Shkodrës se vajza e saj kishte disa kohë që dhunohej nga bashkëshorti.

Edhe pse në kushtet e tronditjes psikike, nëna një ditë më parë ka dhënë këtë deklaratë për policinë vendore të Shkodrës.

Para disa muajsh, familja ka tentuar që ta marrë vajzën me dy fëmijët e saj, por 24 vjeçarja edhe pse fillimisht e ka kërkuar këtë gjë më pas është penduar duke vijuar të qëndrojë tek bashkëshorti i saj.

Bleona Çelaj nuk kishte celular dhe me familjen kishte komunikim të pakët duke qenë se jetonin në Gjermani.

Edhe dy familjet kanë patur një marrëdhënie të ftohtë duke mos komunikuar normalisht. Kjo marrëdhënie e tensionuar është vërejtur edhe ditën e djeshme kur ndodhi tragjedia ndërsa sot janë bashkuar për ceremoninë e varrimit.

Nga ana tjetër bashkëshorti ka deklaruar se “nuk kanë patur konflikte në çift,” ndërsa gjendja e tij psikologjike është tejet e rënduar pas asaj ngjarje të rëndë.

Pavarësisht pretendimeve për dhunë, grupi hetimor sipas veprimeve të kryera në vendngjarje, provave të mbledhura dhe ekspertizës mjeko-ligjore ka bindjen e plotë se djegia e nënës me dy fëmijët është aksidentale.

Hetimet

Në banesën e djegur me tri viktima mbërritën edhe ekspertë të zjarreve nga Tirana.

Sipas grupit hetimor, dhuna e pretenduar nga familja e vajzës nuk ka patur asnjë ndikim në ngjarjen tragjike pasi mendohet se bombola e gazit pas rrjedhjes që mund të ketë patur ka shpërthyer.

Aty ka patur edhe një shishe benzine duke ndikuar ndjeshëm në përhapjen e flakëve dhe eksplozionin e ndodhur.

Policia ka sekuestruar provat materiale, një copë të bombolës që është kryesorja dhe sende të tjera që janë gjetur jashtë të cilat janë dërguar në Tiranë për ekspertizë të mëtejshme.

Nëna me dy fëmijët ndodheshin vetëm në shtëpinë e braktisur në Domen të Postribës sepse bashkëshorti kishte shkuar në një market.

Çifti kishin disa ditë që ishin kthyer nga Gjermania teksa bashkëshorti është nënshtetas gjerman ndërsa Bleona ndodhej në proces dokumentacioni.

Policia dhe prokuroria vijojnë hetimet ndërsa deri tani kanë hedhur poshtë mundësinë e vetëvrasjes dhe mbytjes së fëmijëve nga ana e nënës për shkak të dhunës së pretenduar apo ndonjë ndikimi tjetër duke e cilësuar këtë ngjarje të rëndë si aksidentale.

 Ministrja e Shëndetësisë dhe Mirëqenies Sociale, Evis Sala njoftoi sot  dy vendime të marra në mbledhjen e Qeverisë, në fushën e parandalimit dhe ofrimit të shërbimeve shëndetësore.

“Njëri prej tyre është në fushën e parandalimit, një fushë jetike për të gjithë qytetarët shqiptarë. Këto vendime sjellin dy risi. Për herë të parë hiqet tavani moshor për shërbimin e check up-it. Çdo qytetar në moshën 35 vjeç e sipër do të ketë mundësi të kryejë check up falas”, deklaroi Sala.

Sipas Salës, një tjetër risi është zgjerimi i këtij shërbimi edhe për të moshuarit mbi 70 vjeç.

“Për herë të parë, të moshuarve edhe mbi 70 vjeç, nga shtatori do t’u ofrohet check up falas. Ky është një hap shumë i rëndësishëm në aspektin e parandalimit”, u shpreh ministrja.

Sala bëri të ditur se shërbimet e check up-it dhe dializës, kontratat e të cilave përfundojnë përkatësisht në shtator dhe nëntor, dhe që deri tani janë ofruar nga koncesionarët, do të ofrohen nga shteti.

“Më vjen mirë që po jap sot tre lajme shumë të mira. Janë vendime që ndikojnë drejtpërdrejt te qytetarët, si në fushën e trajtimit, ashtu edhe në atë të parandalimit”, përfundoi ministrja.

 Kryeministri Edi Rama bëri të ditur se në mbledhjen e sotme të Këshillit Kombëtar të Territorit u miratua leja e parë në kuadër të Paketës së Maleve, përfituese e së cilës është familja Hasani nga Thethi.

Rama ndau në rrjetet sociale pamje nga projekti fitues, ndërsa theksoi se Paketa e Maleve u krijon mundësi trashëgimtarëve të investojnë në trojet e të parëve dhe të rikthejnë në jetë shtëpitë e trashëguara.

“Sot u miratua në mbledhjen e Këshillit Kombëtar të Territorit leja e parë e Paketës së Maleve, për familjen Hasani nga Thethi, e cila ka vendosur të investojë kursimet e veta në tokën e të parëve, në vendlindje, dhe të kthehet në Shqipëri”, shkroi Rama.

Sipas Kryeministrit, Paketa e Maleve u jep mundësi trashëgimtarëve që, “me ligj e jo vetëm me zakon”, të rilindin shtëpitë e vjetra të stërgjyshërve ose të zhvillojnë aktivitete ekonomike në pronat e trashëguara.

“Kjo është Paketa e Maleve, paketa e trashëgimtarëve që tanimë, me ligj e jo veç me zakon, mund të rilindin shtëpitë e vjetra të stërgjyshërve apo të zhvillojnë agroturizëm, prodhim bujqësor e blegtoral, si edhe agropërpunim, në tokat e të parëve të tyre”, theksoi Rama duke shtuar se “të tjerat, siç thoshte At Gjergj Fishta, janë DOKRRA HINI”.

Lidhur me ecurinë e programit “Paketa e Maleve” janë miratuar mbi 400 zona zhvillimi në 52 bashki të vendit, ndërsa numri i aplikimeve të miratuara ka kaluar 1200.