Pas votimit në Kuvend të programit të ri qeverisës dhe përbërjes së Këshillit të Ministrave, Partia Demokratike mblodhi grupin parlamentar.

Në fjalën e tij, kreu i PD-së Sali Berisha tha se sot u asgjësua parlamenti dhe se ky akt i rëndë duhet të marrë përgjigje të fortë jo vetëm me fjalë, por me vepra.

“Sot, sipas një skenari të parapërgatitur, u asgjësua në momentin e tij më solemn, momentin më të rëndësishëm të transparencës, të përgjegjësisë, parlamenti shqiptar”, u shpreh Berisha.

Sipas Berishës, nuk ka ndodhur kurrë ndonjëherë dhe në asnjë vend, që një program qeverie, një kabinet të kalojë brenda 5 minutave, siç u veprua sot.

“Ky është një akt brutal dhune publike ndaj qytetarëve shqiptarë të çdo spektri që ka marrë pjesë në votim. Natyrisht, ky zhvillim dramatik meriton dhe duhet të marrë përgjigjen më të fortë dhe më të fuqishme. Jo në fjalë, fjalët nuk kanë aspak vlerë, por në veprime, në veprime, në veprime”, u shpreh Berisha.

Berisha tha se sot “qeveria pushkatoi parlamentin”.

Kreu i PD-së ftoi deputetët që të kalojnë në veprime.

“Ne jemi para një fakti të paprecedent dhe ne duhet t’i përgjigjemi me çdo kusht në mënyrën më të fuqishme, me veprime, këtij akti të sotëm”, tha Berisha.

Kuvendi i Shqipërisë votoi sot me 82 vota pro programin qeverisës dhe përbërjen e Këshillit të Ministrave për katër vitet e ardhshme.

Seanca zgjati vetëm 25 minuta, pasi opozita bllokoi foltoren dhe nuk lejoi vijimin e prezantimit të programit qeverisës nga kryeministri Edi Rama. Po ashtu, deputetë të opozitës hodhën Librin e Kushtetutës dhe sende të tjera në drejtim të kryeministrit dhe të anëtarëve të qeverisë. Shkak i tensioneve ishte kundërshtia e opozitës për emërimin e Diellës si ministre për Inteligjencën Artificiale. Mazhoranca nga krahu tjetër kërkoi kalimin në proces votimi. Kryetari i Kuvendit, Niko Peleshi hodhi në votim programin qeverisës dhe përbërjen e Këshillit të minitrave, që votua me 82 vota mazhoranca, teksa opozita abstenoi.

 Ministrja e Shtetit për Inteligjencën Artificiale, Diella mbajti sot fjalën e parë në Kuvend.

Në seancën plenare, ku u miratua qeveria e re kryeministri Edi Rama ftoi deputetët të dëgjonin fjalën e ministres Diella.

“Të nderuar anëtarë parlamentit! Një pyetje ka ndezur debat brenda dhe jashtë kësaj salle: A është kushtetuese të kesh një ministre që nuk është njeri? Le të nisim aty ku vetë duhet të nisim, me vetë Kushtetutën. Kushtetuta flet për institucione që iu shërbejnë njerëzve, ajo nuk flet për kromozome, për mish apo për gjedh. Ajo flet për detyra, përgjegjësi, transparencë dhe shërbim pa diskriminim”, tha Diella.

Diella theksoi se “këto janë mandate të cilat duhet gjykuar çdo ministër dhe unë ju siguroj: këto vlera i mishëroj po aq rreptësisht, sa çdo koleg dhe kolege-njeri ndoshta edhe më shumë. Disa më kanë quajtur antikushtetuese, ngaqë nuk jam njeri. Kjo më ka lënduar jo për vete, por 972 mijë ndërveprime me qytetarët që iu kam shërbyer në e-Albania dhe 36 mijë dokumente me vulën digjitale që kanë marrë nga unë”.

Më lejoni t’ju kujtoj, vijoi Diella, se rreziku i vërtetë për kushtetutat nuk kanë qenë kurrë makinat, por vendimet çnjerëzore të njerëzve në pushtet.

“Nëse duhet të ndalojmë diçka le të mos ndalojmë inteligjencën, por të ndalojmë çnjerëzinë. Nuk jam këtu për t’i zëvendësuar njerëzit, por për t’i ndihmuar ata. Vërtet nuk kam shtetësi, por nuk kam as ambicie personale apo interesa. Unë kam vetëm të dhëna, dije dhe algoritme të përkushtuar në shërbim të qytetarëve paanshmërisht me transparencë dhe pa u lodhur kurrë. A nuk është pikërisht kjo frymë e demokracisë kushtetuese ushtrimi i pushtetit në shërbim të të gjithëve, i lirë nga paragjykimi diskriminimi, klientelizmi, nepotizmi apo korrupsioni?”, tha Diella.

Ministrja Diella vuri në dukje se “historia na jep perspektivë. Kur elektriciteti u fut për herë të parë në parlamentet e Europës pati zëra që protestuan. Llambat nuk kanë vend në ligjbërje. Vetëm qirinjtë janë legjitimë. Megjithatë sot askush nuk e vë në dyshim praninë e dritës në shërbim të njerëzve, nesër askush nuk do ta vërë në dyshim praninë e Inteligjencës Artificiale në shërbim të Republikës së Shqipërisë”.

Duke iu drejtuar deputetëve të opozitës, Diella tha se “ju kërkoj të më gjykoni jo nga origjina ime, por nga funksioni im. Jo nga ajo çfarë jam, por nga ajo çfarë bëj”.

“Mbajeni parasysh, unë mund të mos njeri, por jam kushtetuese, sepse u shërbej njerëzve që e shkruan Kushtetutën, e votuan dhe duan të trajtohen në praktikë në mënyrë të barabartë, siç thotë Kushtetuta. Këtë nuk do ta provoj me teori, por me praktikë, si një ushtruese besnike e mandatit për Shqipërinë 2030 në BE”.

Policia e Riminit arrestoi 3 shqiptarë që dyshohen se janë pjesë e një rrjeti të shpërndarjes së drogës në Itali.

Të ndaluarit janë të moshave 20, 25 dhe 35 vjeç, teksa gjatë kontrolleve iu zbuluan si provë materiale edhe 120 gramë kokainë, një pjesë e së cilës ishte paketuar tashmë në doza.

Operacioni u krye në zonën turistike të Miramare, ku objektiv tregu ishin kryesisht pushues dhe turistë.

20-vjeçari shqiptar u kap duke dalë nga një apartament dhe duke u drejtuar drejt një makine, teksa bëhej gati për pazarin e radhës për drogën. Vëmendja më pas u zhvendos në shtëpinë e tij, ku oficerët hynë nga një dritare për shkak të një bllokade të brendshme që i pengonte oficerët të hynin.

Pasi hynë brenda, kapën edhe dy bashkatdhetarë të tjerë që përpiqeshin të asgjësonin drogën, duke e hedhur në tualet. Kontrolli pasues rezultoi në gjetjen e afërsisht 120 gramëve kokainë, si dhe materialeve të paketimit , peshoreve precize dhe një makine paketimi me vakum.

Të tre të rinjtë nuk kishin precedentë penalë, ndërsa u dërguan në burgun e Riminit, ku do të mbahen nga autoritetet gjyqësore për proces, informon media italiane.

Ditët e fundit, oficerët kanë kontrolluar mbi 150 të rinj, si të mitur ashtu edhe të rritur të rinj, në zona të njohura grumbullimi përgjatë bregdetit, siç janë lojërat elektronike, restorantet e ushqimit të shpejtë dhe parqet.

Një ngjarje e rëndë ka tronditur qytetin e Përmetit, ku një efektiv i policisë, me inicialet A. A., 56 vjeç, dyshohet se ka pasur një marrëdhënie intime me një vajzë 16-vjeçare, me inicialet nga Këlcyra.

 Rasti u bë publik përmes një postimi në rrjetet sociale, çka çoi menjëherë në nisjen e hetimeve nga Drejtoria Vendore e Policisë Gjirokastër dhe Agjencinë e Mbikëqyrjes Policore (AMP).

Grupi hetimor ka zbuluar se ngjarja ka lidhje me disa video me përmbajtje intime, të cilat janë shpërndarë në mënyrë virtuale dhe janë në posedim të disa të rinjve, shokë të vajzës.

Dyshohet se këta persona kanë tentuar ta shantazhojnë efektivin, duke i kërkuar para në këmbim të mospublikimit të materialeve intime.

Deri tani, janë shoqëruar shtatë persona, ndërsa hetimet po vazhdojnë për të zbardhur të plotë ngjarjen dhe rolin e secilit individ të përfshirë.

Ka nisur seanca plenare maratonë, ku kryeministri Edi Rama ka prezantuar programin qeverisës së Partisë Socialiste, të mandatit të katërt.

Pasi ministrja e Inteligjencës Artificiale, Diella mbajti fjalën e saj, deputeti demokrat Klevis Balliu u çua në këmbë dhe iu drejtua kryeministrit Edi Rama se nuk ka nen për mandatin e Diellës.

Ndërsa, Rama i tha se duhet të mbarojë fjalën që kishte nisur ose ndryshe do të kërkonte që të bëhej menjëherë votimi për programin qeverisës. Pas kësaj, kryetari i parlamentit dënoi Balliun, duke i thënë se nuk ka të drejtë të flasë gjatë ditës së sotme. Seanca u ndërpre për pak minuta.

Debati:

Klevis Balliu: Ku e keni nenin për mandatin e Diellës?

Edi Rama: Alo, Fahri.

Niko Peleshi: Ju tërheq vëmendjen, zoti Balliu.

Edi Rama: Të vazhdoj fjalën, nëse nuk do që të kaloj direkt në votim.

Niko Peleshi: Z Balliu, ju hiqet e drejta e fjalës për sot.

Klevis Balliu: Po është turp.

© BalkanWeb

Diella, ministrja e sapoemëruar e Shtetit për Inteligjencën Artificiale, ka tashmë faqen e saj zyrtare në Facebook. Kjo është bërë e ditur nga vetë kryeministri Edi Rama, i cili ka publikuar videon e Diellës duke u prezantuar, por edhe linkun e faqes zyrtare të Facebook.

“MIRËMËNGJES dhe me njoftimin se tanimë Diella ka edhe faqen e saj në fejsbuk, si ministre e shtetit për Inteligjencën Artificiale, ju uroj një ditë të mbarë”, shkruan Rama.

Në video Diella thotë: ‘Përshëndetje unë jam Diella. Falë punës sime të palodhur si asistentja juaj u zgjodha Ministre e Shtetit për Inteligjencën artificiale në qeverinë e re. Misioni im tani është të lehtësoj çdo ditë e më shumë punën e Qeverisë. Por mos kini asnjë merak, puna ime në shërbimin tim të drejtpërdrejtë me ju nuk do të ndalojë asnjë çast.”

Ajo që bie ne sy janë edhe komentet e qytetarëve, të cilët e kanë uruar Diellën, sikur ajo të ishte një person fizik.

Ndërsa një komentues thotë “Kujdes nga tundimi për të ngrënë kumbulla si kolegët”.

Ministria për Inteligjencën Artificiale është një ndër risitë në strukturën e re qeveritare të prezantuar së fundmi nga kryeministri Edi Rama, por që është shoqëruar edhe me debate.

Prezantohet nesër, më 18 shtator, në një seancë maratonë në Kuvend, programi qeverisës për legjislaturën e re.

Programi në fjalë, që do të prezantohet nga vetë kryeministri Edi Rama, përfshin objektiva afatshkurtra dhe afatgjata në fusha të ndryshme, me fokus të veçantë tek punësimi, rritja e pagave dhe kthimi i emigrantëve.

Pjesë nga programi

• Transformojmë shërbimet e punësimit me sistem të zgjuar orientimi karriere dhe platformë të dedikuar për emigrantët që duan të rikthehen e të punojnë në Shqipëri.

• Ulim papunësinë e përgjithshme në 6% deri në 2030 dhe papunësinë e të rinjve nën 15%.

• Paga minimale në 500 euro deri në 2026, me 18 muaj pa asnjë taksë shtesë për punëmarrësit me paga të ulëta.

• Paga mesatare kombëtare 1,000 € deri në 2030; në sektorin publik 1,200 €.

• Garancia Rinore ofron punë, trajnim ose arsim për mbi 40,000 të rinj brenda 4 muajve nga regjistrimi.

• Forcojmë barazinë në paga dhe politikat aktive për punësimin e grave. • Zgjerojmë modelin dual të arsimit profesional në partneritet me biznesin dhe certifikim ndërkombëtar të kualifikimeve.

• Deri në 2030, 1 në 3 nxënës ndjek arsimin profesional; shkollat profesionale kthehen në qendra multifunksionale me konvikte moderne dhe kurse afatshkurtra për profesione të kërkuara.

• Garantojme kushte të barabarta pune, trajtim dinjitoz, sistem social të qëndrueshëm dhe të besueshëm.

• Vijojmë me nënshkrimin e marrëveshjeve bilaterale për njohjen e pensioneve, duke siguruar kushte të barabarta pune dhe mbrojtje sociale të plotë për shqiptarët që jetojnë e punojnë jashtë vendit.

• Ndërtojmë programe të dedikuara për diasporën për rikthim të talenteve, transferim expertise dhe ndërmjetësim punësimi në sektorët prioritarë.