Autoritetet italiane, të mbështetura nga Europol kanë goditur një grup kriminal të lidhur me “Ndraghetën”.

Ditën e djeshme, më 8 korrik, pas një operacioni të zhvilluar në të gjithë Italinë, Spanjën dhe Shqipërinë, ekipet speciale të ndërhyrjes kanë arrestuar 28 persona të dyshuar me kombësi italiane dhe shqiptare.

Midis individëve të ndaluar është një shtetas italian nga rajoni i Kalabrisë i cili dyshohet se ishte në krye të grupit kriminal në zonën e San Basilio të Romës.

Ky individ, së bashku me tre djemtë e tij, dyshohet se bashkëpunonte ngushtë me një grup kriminal shqiptar, i cili merrej me disa nga aspektet logjistike të tregtisë së trafikut të drogës.

Anëtarët shqiptarë të këtij rrjeti dyshohet se organizonin nxjerrjen e ngarkesave nga porte të ndryshme spanjolle dhe holandeze, si dhe transportin e mëvonshëm në Itali. Përveç kësaj, ata ishin përgjegjës për shitjen e drogës në pjesë të tjera të Romës.

Hetimet tregojnë se kokaina e shitur në Itali është blerë në Amerikën e Jugut dhe është transportuar në kontejnerë në porte anembanë Evropës. Transporti nga porti i Gioia Tauro në Kalabri për në Romë dyshohet se është lehtësuar nga ndërmjetës kriminelë kalabrezë.

Tortura si mjet për të mbjellë frikë brenda organizatës kriminale

Personat e arrestuar dyshohet se kanë trafikuar të paktën 1019 kilogramë kokainë dhe 1497 kg hashash në 80 raste trafikimi.

Prokurorët dyshojnë se katër individë italianë kanë rrëmbyer një trafikant droge, duke i shkaktuar atij dëme fizike dhe psikologjike, një shembull i dhunës së rëndë që lidhet me organizatën kriminale Ndrangheta.

Tortura është filmuar me një telefon celular, dhe videoja është përhapur më pas me qëllim që të ngjallë frikë, heshtje dhe nënshtrim tek anëtarët e grupit kriminal të vendosur në Romë.

Ky hetim kompleks nxori në dritë edhe metodat e sofistikuara të komunikimit të përdorura për të shkëmbyer informacion brenda organizatës kriminale.

Për të shmangur zbulimin nga autoritetet, anëtarët e saj mbështeteshin në mesazhe të koduara nëpërmjet pajisjeve të shpërndara nga një ofrues shërbimesh kriminale shqiptar, i cili u arrestua gjithashtu më 8 korrik.

Qeveria Shqiptare po harton 6 reforma të reja që lidhen me sektorët më të rëndësishëm në vend. Lajmi u bë më dije nga Kryeministri Edi Rama në një postim në platformën X, ndërsa nuk mungoi një kundërpërgjigje për debatet që po zhvillohen teksa lirohen hapsirat publike.

Edi Rama: Toleranca ndaj tokave të xanuna në kurriz të komunitetit apo lejeve me shkelje në kurriz të qytetit, që janë pranuar nga qeverisja vendore si bashkëudhëtare të jetës urbane, ndërkohë që inspektoriatet e mbrojtjes së territorit dhe policitë bashkiake janë bërë në të shumtën e rasteve pjesë e problemit, do të adresohet rrënjësisht me një reformë të re ligjore të kontrollit e të zhvillimit të territorit, për të cilën kemi nisur nga puna paralelisht me disa reforma të reja të shërbimit me ujë të pishëm, të sistemit të pastrimit e të përpunimit të mbetjeve, të furnizimit të popullit me naftë e me barna, si edhe të shërbimit spitalor, që do të jenë piketat e hyrjes në rrugën e mandatit tonë të katërt për Shqipërinë 2030 në Bashkimin Europian.

Prej ditës së shtunë, kreu i qeverisë dha ultimatum për të nisur aksioni për lirimin e hapësirave publike në disa qytete të vendit, përfshirë edhe kryeqytetin./vizionplus.tv

Një gjykatë greke ka shpallur fajtor dhe ka dënuar me burgim të përjetshëm një 44-vjeçar me origjinë shqiptare, për vrasjen makabre të bashkëshortes së tij 31-vjeçare, ngjarje e ndodhur më 30 korrik 2021 në zonën Dafni të Athinës.

Sipas aktit të ekspertizës mjekoligjore, viktima, Anisa, u godit dy herë me thikë në qafë teksa ndodhej e shtrirë në krevat, pa mundur të reagojë. Autori përdori një thikë kuzhine me gjatësi 28 centimetra për të kryer krimin.

Gjykata greke vendosi dënimin maksimal për të pandehurin: burgim të përjetshëm, si dhe 24 muaj shtesë, pa asnjë ulje apo lehtësim penal.

Autori kishte në pronësi një lokal fast-food në zonën Haravgji të Athinës dhe jetonte me bashkëshorten dhe djalin e tyre të vogël. Sipas dëshmive të fqinjëve, marrëdhënia mes çiftit ishte e tensionuar, me debate të shpeshta dhe episode dhune. Shpeshherë, viktima kishte kërkuar ndihmë duke bërtitur nga ballkoni.

Gjatë procesit gjyqësor, i pandehuri tentoi të justifikojë aktin duke akuzuar viktimën për një lidhje jashtëmartesore, pretendim që nuk u provua dhe u hodh poshtë nga trupi gjykues.

Avokati i familjes së viktimës deklaroi se sjellja e autorit u konsiderua plotësisht e dënueshme dhe se gjykata nuk njohu asnjë rrethanë lehtësuese.

“Ky vendim nuk mund të rikthejë jetën e humbur, por dërgon një mesazh të fortë drejtësie dhe besimi në shtetin ligjor,” u shpreh ai në një deklaratë për mediat.

DËSHMIA E AUTORIT

Në dëshminë e tij pas krimit, 44-vjeçarit me origjinë shqiptare, e paraqiti aktin e tij si një moment “errësimi mendor”, duke ia atribuar pjesërisht përgjegjësinë edhe viktimës.

“Jam i shkatërruar shpirtërisht dhe i penduar që në sekondën e parë pas asaj që ndodhi”, tha ai, duke shtuar se menjëherë pas krimit u vetëdorëzua në polici, ku rrëfeu gjithçka.

Ai theksoi se nuk kërkon vetëm falje ndaj autoriteteve, por mbi të gjitha “ndaj prindërve të gruas sime dhe fëmijës tonë të vetëm”.

44-vjeçari pretendonte se nuk arriti të kontrollonte veten, duke përshkruar se kishte vendosur një pajisje për regjistrimin e zërit në shtëpi dhe se kishte dëgjuar regjistrime që e kishin “çmendur”.

“M’u errësua mendja. Nuk dija çfarë bëja”, tha ai, duke përmendur se regjistrimet përmbanin episode të një lidhjeje jashtëmartesore të bashkëshortes, akuza që nuk u vërtetuan kurrë dhe u refuzuan nga Gjykata.

Si provë, ai dorëzoi një USB me biseda të gruas së tij me një person të tretë, duke tentuar të legjitimojë pretendimet për tradhti. Sipas tij, “nuk e përballoja dot që gruaja që e doja të bënte gjëra të tilla në shtëpinë tonë, madje në dhomën e fëmijës”.

Autori përshkroi me detaje tmerruese momentin e vrasjes, duke pohuar se hyri në dhomë me një thikë 28 centimetra të gjatë dhe e goditi dy herë në qafë ndërkohë që ajo flinte.

Ai rrëfeu se i mbylli gojën me dorë për të mos bërtitur dhe se pasi ajo pushoi së rezistuari, u largua, la thikën pranë trupit dhe pastroi gjakun nga duart.

Në një përpjekje për të minimizuar përgjegjësinë e tij, 44-vjeçari pretendoi se debatonin shpesh, se ajo kishte kërkuar divorc dhe se ajo e ofendonte dhe e godiste fizikisht. Megjithatë, këto pretendime nuk u konfirmuan gjatë hetimit apo nga dëshmitarët.

Gjykata nuk e pranoi asnjë nga justifikimet e autorit, duke theksuar se ai kishte vepruar me vetëdije të plotë dhe se sjellja e tij ishte plotësisht e dënueshme. Asnjë lehtësim nuk iu njoh.

Ministrja e Arsimit dhe Sportit, Ogerta Manastirliu, njoftoi sot hapjen zyrtare të regjistrimeve online për klasat e para dhe të dhjeta në portalin e-Albania. Prindërit dhe nxënësit mund të kryejnë regjistrimin nga data 7 korrik deri më 31 gusht, duke eliminuar nevojën për paraqitje fizike në shkolla dhe duke garantuar një proces më efikas.

“Regjistrimet online për klasat e para dhe të dhjeta hapen sot, më 7 korrik, në #eAlbania. Sistemi do të qëndrojë i hapur deri më 31 gusht, duke u dhënë mundësi të gjithë prindërve të regjistrojnë fëmijët e tyre në kohën më të përshtatshme për ta”, bëri me dije, Ministrja Manastirliu.

Përmes këtij shërbimi elektronik, qytetarët përfitojnë nga një proces i thjeshtuar, pa kosto shtesë dhe pa vonesa. Regjistrimi mund të kryhet lehtësisht nga çdo pajisje që ka akses në internet, duke hyrë në llogarinë personale në www.e-albania.al dhe duke ndjekur hapat e udhëzuara në shërbimin përkatës për regjistrimin e nxënësve të klasës së parë dhe të dhjetë.