Në Vlorë, në një vilë thuajse të harruar të viteve ’30, gjejmë xha Thanasin. I ka dhënë jetë kësaj hapësire, me lulet shumëngjyrëshe që mbjell çdo ditë. As mosha dhe as vapa përvëluese nuk janë pengesë për Thanas Zharrën, agronomin me eksperincë 62 vjeçare që gjeti kënaqësinë dhe qetësinë tek puna në natyrë.

“Të punosh me bimët dhe në natyrë është gjëja më e kënaqshme. Unë këtu shpenzoj jo më pak se 8 orë, por nuk ka kufi. Puna të thërret në çdo moment. Lulja është si fëmija. Do i japësh ujë, se ndryshe thahet”, thotë 81 vjeçari ndërsa thekson se kjo punë i ka shtuar jetën.

“Arritjen e moshës, që kam arritur në këtë fazë, ia dedikoj pikërisht kësaj lloj pune që të jep vetëm kënaqësi. Pavarësisht nga hallet që mund të ketë njeriu, lulja të normalizon, të heq vëmendjen dhe të jep kurajo”, thotë agronomi.

Nuk e fsheh zhgënjimin për pensionin e ulët, ndonëse ishte ndër të parët që kontribuoi për lulet.

“Kur të gjithë kërkonin të bënin luftë, unë jepja mesazhin që duhet paqe. Për këtë hapa dyqanin e parë në Vlorë me qëllim për t’iu thënë njerëzve të merremi me lule, mos të merremi me armë. Unë them që ia kam dalë. Në Vlorë janë hapur shumë dyqane të tilla. Kjo tregon që vlonjatët e dashurojnë të bukurën.

Lulja të krijon stabilitet dhe të jep një të ardhur. Unë marr një pension prej 170 mijë lekësh dhe më duket shumë i ulët. 62 vjet eksperiencë pune dhe të marrësh një pension të tillë është shumë qesharake.”, shprehet xha Thanasi i keqardhur.

Në një ditë të zakonshme kontrollon gjendjen e bimëve, nëse ka mungesë uji ose nevojë për plehërim. Merret me krasitje, përgatit fidanët e rinj ose shet lule.
Përveç tyre, ruan dhe varietetet autoktone si dardha dhe fiqtë. Mes të tjerash tregon se po synon të marrë prodhim nga fara e avokados, banania dhe lime, të treja shumë të kërkuara në Vlorë.

“Të them të drejtën, nuk do heq dorë deri në momentin e fundit të jetës. Nuk do lë ditë pa ardhur në punë dhe pa iu shërbyer luleve. E njoh tipologjinë e bimëve, cila është rezistente dhe cila jo. Duke i njohur, manovron dhe i ruan. Mua kjo punë më ka shtuar jetën!”, përfundon agronomi. Emisionin “Një nga ne” mund ta ndiqni çdo të mërkurë, ora 20:00 në ekranin e “Report Tv”.

VIDEO

Familja e 16-vjeçares shqiptare Emilia Veliu, e cila rezulton e zhdukur prej mbrëmjes së të hënës kur humbi çdo gjurmë në zonën e Petralonës ku ajo jetonte, po kërkon informacion në lidhje fatin e vajzës së tyre.

Sipas nënës së 16-vjeçares, e cila foli për protothema.gr, Emilia doli për një shëtitje me shoqet e saj dhe nuk u kthye më në shtëpi.

Frika dhe ankthi i prindërve është se fëmija i tyre ndodhet në rrezik, pasi s’kanë pasur asnjë komunikim me të.

“Nuk kam dëgjuar më nga vajza ime që nga mbrëmjes së të hënës kur ajo u zhduk. Më tha se do të dilte me shoqet e saj për një shëtitje dhe që atëherë nuk është kthyer në shtëpi.

Kur pashë se po vonohej të kthehej nga shëtitja, u shqetësova dhe komunikimet tona të fundit ishin nëpërmjet mesazheve në celularin e saj. Mesazhi i fundit ishte ‘Nuk do të kthehem më në shtëpi’. Jam shumë e shqetësuar për fatin e fëmijës tim, telefoni i saj celular është i çaktivizuar, kam frikë se mund të jetë përfshirë në shoqëri të keqe. Dhe mesazhi që dërgoi se ‘Nuk do të kthehem më në shtëpi’, besoj se fshihet një person tjetër që dëshiron ta dëmtojë. Dua të zbuloj informacione për vajzën time, po e kërkoj kudo dhe dua që ajo të kthehet përsëri në shtëpinë tonë…”, tha e ëma e adoleshentes.

Tre pjesëtarë të organizatave kriminale të shumëkërkuar nga drejtësia shqiptare do të ekstradohen ditën e sotme nga Dubai.

Tre të shumëkërkuarit që do të ekstradohen janë:

Ado Xhika alias Ado Cërriku alias Elkier Cërriku, i akuzuar nga GjKKO-ja, se në kuadër të organizatës kriminale, ka përkrahur shtetasin e shumëkërkuar Talo Çela

Ervis Daka, i akuzuar nga GjKKO-ja, si pjesëtar i një organizate kriminale që ka planifikuar vrasje dhe si përkrahës i një shtetasi të shumëkërkuar;

Maksim Koçi, i akuzuar nga GjKKO-ja, për vrasje dhe sigurim të mjeteve për të kryer vrasje, të kryera në kuadër të organizatës kriminale, si dhe si përkrahës i një shtetasi të shumëkërkuar.

Njoftimi i policisë:

Si rezultat i bashkëpunimit të pandërprerë me partnerët në Emiratet e Bashkuara Arabe, pritet që gjatë ditës së sotme, të finalizohen procedurat për ekstradimin nga Dubai, në Shqipëri, të shtetasve të shumëkërkuar, pjesëtarë të organizatave kriminale:

A. Xh. alias A. C. alias E. C., i akuzuar nga GjKKO-ja, se në kuadër të organizatës kriminale, ka përkrahur një shtetas të shumëkërkuar;

E. D., i akuzuar nga GjKKO-ja, si pjesëtar i një organizate kriminale që ka planifikuar vrasje dhe si përkrahës i një shtetasi të shumëkërkuar;

M. K., i akuzuar nga GjKKO-ja, për vrasje dhe sigurim të mjeteve për të kryer vrasje, të kryera në kuadër të organizatës kriminale, si dhe si përkrahës i një shtetasi të shumëkërkuar.

Në lidhje me orën e mbërritjes, do të ketë një njoftim tjetër.

Policia e Shtetit ka shpallur planin e detajuar të masave për sezonin turistik veror 2025, i cili synon garantimin e rendit, sigurisë publike dhe menaxhimin e fluksit turistik në të gjithë vendin, me theks të veçantë në zonat bregdetare, liqenore dhe turistike.

Masat kryesore përfshijnë:

Sigurinë në zonat bregdetare, liqenore dhe lumore;

Lehtësimin e qarkullimit në pikat e kalimit kufitar;

Parandalimin e aksidenteve rrugore dhe veprimtarive kriminale;

Zbatimin e orarit të ndalimit të muzikës;

Mbrojtjen e mjedisit dhe zonave turistike.

Ndryshe nga viti i kaluar, këtë vit shërbimi 12-orësh do të aplikohet vetëm në zonat bregdetare. Në ndihmë të policive vendore do të dërgohen shërbime shtesë të cilat do të kompensohen sipas legjislacionit përkatës.

Në funksion të planit janë vënë në dispozicion:

Dhjetëra automjete dhe motomjete për rritjen e gatishmërisë dhe reagimit të shpejtë;

Punonjës policie me biçikleta që patrullojnë në plazhe, për forcimin e policimit komunitar dhe për t’iu ofruar ndihmë pushuesve;

Njësia Policore Detare për kontrollin dhe ndëshkimin e lundrimeve të rrezikshme brenda zonave të ndaluara;

Dronë që do të përdoren nga shërbimet policore për kontrollin e perimetrit të sigurisë në plazhe, si dhe për evidentimin dhe ndëshkimin e shkeljeve rrugore.

Policia Kufitare ka marrë masa për shtimin e sporteleve dhe burimeve njerëzore në PKK, me qëllim menaxhimin e fluksit turistik.

Do të ketë shtim të kontrollit në kufirin e gjelbër dhe në kufirin blu, për të parandaluar krimin kufitar dhe kalimet e paligjshme.

Policia Rrugore, me pajisjet inteligjente, dronët dhe alkooltestuesit, do të jetë 24/7 në të gjitha akset rrugore kombëtare dhe në qendrat e banuara.

Njëkohësisht, janë shtuar patrullat në zonat turistike për parandalimin e aksidenteve rrugore dhe për garantimin e lëvizjes së lirë të automjeteve.

Nga 16 qershori deri më 15 shtator 2025, do të kufizohet qarkullimi i mjeteve të rënda për transport mallrash në fundjavë dhe në ditët e pushimit zyrtar.

Për të zbatuar dhe përmbushur sa më mirë masat e përcaktuara në planin e masave, strukturat vendore të Policisë po bashkëpunojnë me:

agjencitë turistike për destinacionet turistike, për pajisjen e mjeteve lundruese me dokumentacionin përkatës dhe zbatimin me rigorozitet të rregullave të lundrimit dhe masave të sigurisë;

kryetarët e fshatrave dhe pushtetin vendor;

vrojtuesit e plazheve, emergjencat civile dhe ato shëndetësore, si dhe me shërbimet zjarrfikëse.

Ndërkohë, nga shërbimet e Policisë po vijon operacioni “Plazh i lirë”, për lirimin e hapësirave bregdetare të zaptuara në mënyrë të paligjshme.

Gjithashtu, do të ushtrohen kontrolle për zbatimin e orarit të muzikës dhe ndëshkimin e shkelësve të nivelit të zhurmës. Tashmë, punonjësit e Policisë janë pajisur me aparate të matjes së zhurmave.

Ndërkohë, krahas planit të masave, Drejtori i Përgjithshëm i Policisë së Shtetit ka urdhëruar ngritjen e grupeve të monitorimit të shërbimeve në terren, për zbatimin rigoroz të Kodit të Etikës, nga çdo punonjës policie, në komunikim dhe në veprim.

Policia e Shtetit mbetet e angazhuar për garantimin e rendit dhe sigurisë publike, si dhe fton qytetarët të bashkëpunojnë dhe të denoncojnë çdo paligjshmëri në numrin pa pagesë 112