Një 41-vjeçar shqiptar i kërkuar ndërkombëtarisht për një vjedhje prej 130 mijë eurosh të kryer në vitin 2016 në Stoupa të Greqisë, është burgosur.
Ai u arrestua nga Policia e Shtetit në Aeroportin Valerio Catullo të Veronës, “Villafranca”, teksa përpiqej të rikthehej drejt Tiranës.
Oficerët e Policisë Kufitare thanë se e identifikuan të riun teksa verifikonin dokumentet e pasagjerëve që po niseshin me fluturimin e radhës. Nga aty u zbulua edhe urdhër-arresti ndërkombëtar i lëshuar nga Greqia.
Shqiptari cilësohej si një grabitës profesionist. Sipas dosjes greke, ai akuzohet për hyrje me forcë në makinën e ish-pronarit, që e kishte parkuar pranë restorantit të tij dhe më pas për vjedhjen e një kutie laptopi, që përmbante 130,000 euro në kartëmonedha me prerje të ndryshme.
Sipas autoritetit të ndjekjes penale, krimi u krye nga shqiptari pasi ndoqi viktimën e tij, duke i zbuluar dhe lëvizjet që kryente, pasi ai e kishte punësuar më parë në punë bujqësore.
Duke shfrytëzuar marrëdhënien e besimit të krijuar, i kërkuari dyshohet se ka fituar informacion konfidencial në lidhje me ruajtjen e rregullt të parave nga ish-punëdhënësi i tij, duke vepruar më pas me qëllimin specifik për të nxjerrë fitim personal prej tyre, informon media italiane.
Pas hetimeve të kryera dhe arrestimit, shqiptari u dërgua në burgun e Veronës, ku u mbajt nga autoritetet gjyqësore në pritje të ekstradimit drejt Greqisë. Krimi për të cilin akuzohet parashikon një dënim deri në 3 vite.
Apolonia ka dalë fituese në derbin e Myzeqesë, duke mposhtur sot ekipin vendas me rezultatin 1-0 ne ndeshjen e zhvilluar ne stadiumin “Roza Haxhiu”. Goli vendimtar u shënua nga Amagba në minutën e 65-të, duke i dhuruar skuadrës tri pikët në javën e tetë të Kategorisë së Parë.
Skuadra fierake tregoi një lojë cinike dhe të kujdesshme, duke menaxhuar ndeshjen në mënyrë të matur dhe duke siguruar fitoren e merituar ndaj rivalëve të Lushnjës.
Michele D’Angelo, profesori italian i biologjisë i cili u përfshi në aksidentin tragjik të 8 gushtit në aksin Levan-Fier, është rikthyer në Itali. Ai u lirua nga qelia ditën e djeshme me vendim të Gjykatës së Fierit, e cila vendosi lirimin në këmbim të garancisë pasurore në vlerën 15 mijë euro.
Vendimi i Gjykatës së Fierit është marrë 2 ditë më parë dhe u vendos lehtësimi i masës së sigurisë arrest me burg, ndërsa sipas vendimit profesori italian do duhet të paraqitet të premten e fundit të çdo muaji në orën 14:00 para oficerit të Policisë Gjyqësore në Komisariatin e Fierit.
44-vjeçari i cili prej 75 ditësh ishte burgosur në vendin tonë, pasditen e djeshme së bashku me partneren e tij Vanessa Castelli, ka zbarkuar në aeroportin e Fiumicinos- në Romë dhe më pas është drejtuar për në L’Aquila, në qytezën e tij ku dhe prej vitesh jep mësime në Universitet. Lirimi i tij u pasqyrua dhe në mediat italiane ku më tej thuhet se transferimi i Michele D’Angelo është kryer mes sekretit maksimal nga ana e autoriteteve italiane dhe atyre shqiptare.
Partnerja D’Angelo ka theksuar se makthi ka përfunduar dhe se 44-vjeçari tani mund të marrë frymë lirisht.
“Michele është shumë i tronditur, por mund të themi se makthi ka mbaruar; tani mund të marrim frymë”, tha partnerja e tij, e cila ka ndjekur çdo hap të procesit gjyqësor.
Michele D’Angelo, profesor biologjie në Universitetin e Aquila u arrestua më 8 gusht të këtij viti. Teksa ishte me pushime në vendin tonë, ai u përfshi në një aksident në autostradën Levan-Fier. Automjeti me të cilin po udhëtonte italiani u përplas me një mjet tip Mercedes. Si pasojë e aksidentit një 17-vjeçar humbi jetën 3 ditë më pas në spitalin e Traumës.
Vendimi i Gjykatës së Fierit:
Pranë Gjykatës së Shkallës së Parë të Juridiksionit të Përgjithshëm Fier, u mor ne shqyrtim, në seancë gjyqësore me dyer të mbyllura, cështja penale që u përket palëve, më datë 22.10.2025, pasi mori në shqyrtimi, në seancë gjyqësore me dyer të mbyllura, kërkesën penale me palë:
KËRKUES: M.D, mbrojtur nga Av.Toto Avdija, me numër licence 11326, anëtar i Dhomës së Avokatisë Fier, zgjedhur me deklarim para Gjykatës, në prani të përkthyesit të licencuar Av.Admir Filaj, me licencë numër 562.
KUNDËR: Prokuroria pranë Gjykatës së Shkallës së Parë të Juridiksionit të Përgjithshëm Fier, përfaqësuar nga Prokuror Greta Dreni.
OBJEKTI: Zëvendësimin e masës së sigurimit personal nga “Arrest në burg”, në “Detyrim për tu paraqitur në policinë gjyqësore”, ose “Garancia pasurore”.
BAZA LIGJORE Neni 246 dhe 260 i Kodit të Procedurës Penale
PËR KËTO ARSYE
Gjykata, mbështetur në nenet 228, 229 dhe vijues dhe në nenin 260 të Kodit të Procedurës Penale,
V E N D O S I
Pranimin e kërkesës së kërkuesit M. D
Zëvendësimin e masës së sigurimit personal “Arrest në burg”, caktuar me vendimin nr.62-2025-4585-(1305), datë 12.08.2025, të Gjykatës së Shkallës së Parë të Juridiksionit të Përgjithshëm Fier, me masat e sigurimit personal të “Detyrim për t’u paraqitur në policinë gjyqësore” dhe “Garancia pasurore” e parashikuar nga neni 234 dhe 236 i Kodit të Procedurës Penale.
Garancia pasurore përcaktohet në shumën 15,000 (pesëmbëdhjetë mijë) Euro/ ose 1,500,000 (njëmilionepesëqindmijë) lekë dhe duhet të depozitohet brenda 5 (pesë) ditëve, nga dita e shpalljes së këtij vendimi, në një bankë të nivelit të dytë në Republikën e Shqipërisë.
Personi nën hetim M.D qëndron me masën e sigurimit personal “Arrest në burg”, deri në depozitimin e shumës së garancisë pasurore, sipas këtij vendimi dhe deri në njoftimin e Prokurorit.
Urdhërohet Prokurori për verifikimin të dokumentacionit përkatës si dhe menjëherë dhe në çdo rast jo më vonë se 24 orë nga njoftimi për depozitimin e shumës së garancisë pasurore, të urdhërojë, sipas rastit, lirimin e menjëhershëm të personit nën hetim M.D, nëse ai nuk mbahet apo nuk duhet të mbahet për efekt të ndonjë mase tjetër sigurimi apo vendimi dënimi, ose konfirmimin e masës së sigurimit “Arrest në burg”.
Urdhërohet personi nën hetim M.D të paraqitet para oficerit të policisë gjyqësore, pranë Komisariatit të Policisë Fier, një herë në muaj, përkatësisht, të premten e fundit të çdo muaji, ora 14:00.
Urdhërohet Prokuroria pranë Gjykatës së Shkallës së Parë të Juridiksionit të Përgjithshëm Fier dhe Policia Gjyqësore për ekzekutimin e këtij vendimi.
Kundër këtij vendimi mund të bëhet ankim në Gjykatën e Apelit të Juridiksionit të Përgjithshëm, brenda 5 (pesë) ditëve nga dita e nesërme e njoftimit të vendimit.
Lushnja po konsolidon rolin e saj si një nga qendrat kryesore të bujqësisë shqiptare, me rritje të qëndrueshme të prodhimeve dhe eksporteve bujqësore. Ministri i Bujqësisë dhe Zhvillimit Rural, Andis Salla, vizitoi biznesin e Netës, një ndër operatorët më aktivë në grumbullimin dhe eksportin e frutave e perimeve të sezonit.
Salla vuri në dukje se, falë përkushtimit dhe punës shumëvjeçare, biznesi i Netës është kthyer në një model suksesi, ku çdo ditë ngarkohen dhjetëra kamionë me produkte bujqësore nga Myzeqeja dhe mbarë vendi, për t’u eksportuar drejt tregjeve europiane.
“Po përgatisim domatet e vogla për eksport në Maqedoninë e Veriut. Prodhimi është sipas standardeve të kërkuara, pasi analizat kanë rezultuar plotësisht konform rregullave,” u shpreh Neta gjatë bashkëbisedimit me ministrin.
Ministri Salla vlerësoi përpjekjet e fermerëve dhe biznesit për certifikimin e prodhimeve bujqësore, duke theksuar rëndësinë e cilësisë dhe standardeve si e vetmja rrugë për të siguruar eksport të qëndrueshëm dhe të ardhura më të larta për fermerët.
“Kam nxjerrë një urdhër për kontrollin e çdo farmacie bujqësore. Kushdo që tregton pesticide të ndaluara apo produkte të pakontrolluara do të përballet me masa ndëshkuese, deri në mbylljen e aktivitetit. Nuk do të lejojmë askënd të dëmtojë tregun apo të orientojë fermerët në mënyrë të padrejtë,” theksoi ministri.
Ai shtoi se synimi është që produktet “Made in Albania” të jenë gjithnjë e më të pranishme si në tregun vendas, ashtu edhe në eksportet elitare drejt Europës. e.xh/j.p/
Specialistët e Sektorit të Qarkullimit Rrugor arrestuan në flagrancë shtetasit: -K. B., 62 vjeç, banues në fshatin Babunjë, pasi dje, në fshatin Mërtish, automjeti që drejtonte, është përplasur me automjetin që drejtonte shtetasi Ll. A., 21 vjeç, i cili është në kujdesin e mjekëve; -A. L., 40 vjeç, banues në fshatin Dushk, pasi dje, në Divjakë, automjeti që drejtonte, është përplasur me motomjetin që drejtonte shtetasi N. Gj., 66 vjeç, i cili është në kujdesin e mjekëve.
Specialistët e Seksionit për Hetimin e Narkotikëve referuan materialet në Prokurori, ku nisi procedimi në gjendje të lirë për shtetasin A. G., 28 vjeç, banues në Lushnjë, pasi posedonte doza Cannabisi.
Specialistët për Hetimin e Krimeve të Komisariatit të Policisë Fier kapën dhe ndaluan shtetasin e shpallur në kërkim, S. S., 34 vjeç, banues në Fier, pasi Gjykata e ka dënuar me 1 muaj burgim, për veprën penale “Mosbindja ndaj urdhrit të punonjësit të Policisë së rendit publik”.
Specialistët për Hetimin e Krimeve të Komisariatit të Policisë Lushnjë referuan materialet në Prokurori, ku nisi procedimi në gjendje të lirë për shtetasit: -Gj. Gj., banues në Lushnjë, pasi dyshohet se me vetëgjyqësi, ka prishur murin rrethues të banesës së shtetasit Ç. Ç; -F. K., 54 vjeç, banues në Lushnjë, pasi dyshohet se në kundërshtim me vendimin e Gjykatës, ka shkuar në banesën e vëllait të tij që ishte i pajisur me urdhër mbrojtjeje; -E. P., 39 vjeçe, banuese në fshatin Fier i Ri, pasi dyshohet se ka braktisur fëmijën e saj të mitur; -A. Gj., 28 vjeçe, banuese në Lushnjë, pasi dyshohet se ka ushtruar dhunë ndaj nënës së saj; -R. L., 63 vjeçe, banuese në Lushnjë, pasi dyshohet se me vetëgjyqësi, përdor një sipërfaqe toke që është në administrim të një shkolle; -N. Ç, banues në fshatin Karbunarë, pasi dyshohet se ka pushtuar një sipërfaqe toke në pronësi të një shtetasi 55 vjeç; -T. N., për veprën penale “Ndërtimi i paligjshëm”.
Materialet procedurale iu referuan Prokurorisë së Fierit, për veprime të mëtejshme.
“Gruaja e burrit tim”, komedia e zezë, me regji të Kiço Londos erdhi dy ditë rresht për publikun fierak nën interpretimin e aktorëve të teatrit shëtitës “Çajupi”.
Një lojë e mrekullueshme që zbulon jo vetëm marrëdhënien në bigami të një burri pasi u denoncua i zhdukur në polici nga dy gratë e tij, por sjell njeriun e dyzuar dhe të pavendosur.
“Unë jam mendimit që shoqëria shqiptare, në momentin që po flasim është zhytur në një kaos ekzistencial, një shoqëri në depresion të thellë, një shfaqje e humorit anglez që padyshim bien pas 40 vitesh, është një shenjë që kjo shoqëri ka nevojë për një terapi traume. Paqja bën këtë efekt”, tha regjisori Kiço Londo.
Me njërën nga gratë është martuar në kishë, me tjetrën është martuar në bashki dhe ka vazhduar jetën i qetë deri në momentin, ku pasi ndihmoi një grua të moshuar që po grabitej, përfundon në spital dhe jep dy adresa të ndryshme.
Për regjisorin, Kiço Londo teatri i Fierit është pikë nisje dhe dashuri e pafund.
“Kam munguar këto pesë vjet në këtë teatër, ju siguroj që do jem i pranishëm në Fier dhe nuk do të mungoj”, tha ai.
Shfaqja “Gruaja e burrit tim” , e vënë në skenë 28 vite më herët nën titullin “Burri me dy gra” po nga regjisori Kiço Londo , pas premierës në Tiranë po bën turne në të gjithë vendin.
Interpretimi i aktoreve te rinj Xhejni Fama, Denisa Demaj , Denada Llanaj, Aleksander Kondi Genc Lleshi , Eglein Laknori, Ersiljano Xhelollari u duartrokit fort Plot emocione aktoret vecojne mikpritjen e publikut fierakë.
Kursimi i parave shpesh lidhet me sakrifica të mëdha dhe kufizime, por në fakt, mund të kurseni lehtësisht pa ndryshuar shumë stilin e jetës. Mjafton pak vëmendje në disa zakone të përditshme, dhe rezultati mund të jetë i ndjeshëm në buxhetin tuaj. Ja 5 mënyra të thjeshta për ta bërë këtë 👇
1️⃣ Analizoni shpenzimet e vogla të përditshme
Kafeja e mëngjesit, uji i paketuar, ose blerjet spontane në market janë shpenzime që duken të vogla, por që në fund të muajit bëhen shumë. 💡 Këshillë: mbani një listë shpenzimesh për një javë dhe shikoni se ku mund të zvogëloni pa u ndjerë të privuar.
2️⃣ Bëni blerje të zgjuara
Mos e blini menjëherë atë që ju pëlqen. Prisni 24 orë – shpesh do ta kuptoni që nuk ju duhet vërtet. Kërkoni ulje çmimesh online, përdorni karta bonusesh ose aplikacione që ofrojnë cashback. 💡 Shembull: shumë markete dhe farmaci kanë oferta javore që mund t’i ndiqni në rrjetet sociale.
3️⃣ Kurseni energjinë elektrike
Ndryshoni llambat me ato LED, fikni pajisjet kur nuk i përdorni dhe përdorni lavatriçen vetëm kur është plot. Këto ndryshime të vogla ulin ndjeshëm faturën e energjisë, pa ndryshuar komoditetin tuaj.
4️⃣ Përdorni më shumë transport publik ose ecni
Nëse jetoni në qytet, përdorimi i makinës për distanca të shkurtra është shpenzim i panevojshëm. Jo vetëm që kurseni karburant, por bëni edhe një investim për shëndetin tuaj.
5️⃣ Investoni në gjëra me cilësi
Ndonjëherë produktet e lira kushtojnë më shumë në plan afatgjatë. Zgjidhni produkte cilësore që zgjasin më shumë, si veshje, këpucë apo pajisje shtëpiake. Kështu shmangni blerjet e shpeshta.
💬 Përfundim: Nuk keni pse të hiqni dorë nga gjërat që ju pëlqejnë për të kursyer para. Mjafton të bëni disa ndryshime të vogla në zakonet tuaja dhe do të shihni diferencën në llogarinë bankare.
22 mijë doza vaksinash kundër gripit janë shpërndarë nëpër qendrat shëndetësore në Lushnje. Edhe ky 77- vjeçar ndonëse pohon se prej vitesh nuk e ka zënë gripi, është duke bërë dozën e radhës.
“Çdo njeri duhet ta bëj sepse të mbron nga viruset stinore”, u shpreh një qytetar.
Mësuesit, policët dhe stafi mjekësor në Lushnjë, kanë qenë të parët që u vaksinuan. Të sëmurët kronikë, moshat e treta dhe fëmijët, si më të ekspozuar ndaj riskut po u injektohet doza e parë, për ti paraprirë shpërthimit të virozave.
“22 mijë dozat që kanë ardhur janë vaksina koreane, janë monovalentëe dhe 10 dozash dhe janë viruse që kanë qarkulluar edhe vitin e kaluar. Ju bëj thirrje ta aplikojnë vaksinën”, tha Mimoza Kote, vaksinatore.
“Janë shpërndarë të gjitha në Qendrat Shëndetësore, dhe të aplikuara deri tani janë 14 mijë doza. Ka vaksina të mjaftueshme për të gjithë personat që kanë dashur ta aplikojnë”, theksoi Sebastian Davidhi, krye vaksinator.
Vaksinimi rekomandohet të fillojë përpara sezonit të gripit në mënyrë që trupi të jetë I përgatitur të reagojë kundër virozave respiratore të shkaktuara nga viruset. Për të moshuarit dhe pacientët kronikë që nuk mund të shkojnë në qendrat shëndetësore, mjekët dhe infermierët në Lushnje po ofrojnë vaksinimin në banesë.
38-vjeçari Anthony Deschepper, tronditi Kanadanë, teksa vrau gruan e tij shqiptare, Savannah Kulla, 29 vjeç.
Shkaqet e krimit janë ende të paqarta ndërsa ajo që ka mbetur pas, janë vetëm fëmijët e çiftit, pasi autori u ekzekutua nga policia pas ngjarjes.
Një buqetë me lule është vendosur në trotuar në nderim të shqiptares që u qëllua për vdekje nga bashkëshorti, ndërsa autoritetet kanadeze kanë nisur hetimet për ngjarje e kobshme.
Komuniteti i Brampton është tronditur nga ngjarja ndërsa çifti tashmë kanë lënë pas 3 djem dhe 1 vajzë të vogël.
Pas vrasjes së gruas në një parking, autori tentoi të arratisej me foshnjen 1-vjeçare në duar, por u ekzekutua nga policia, ndërsa fatmirësisht fëmija shpëtoi.
Dyshohet se çifti kishin probleme ndërsa mediat raportojnë se autori 38-vjeçar tentoi të largohej nga vendngjarja më ndihmën e një gruaje tjetër që e priste me makinë.
Nëna e Kullës tha për mediat kanadeze se nuk e kishte besuar kurrë se diçka e tillë do t’i ndodhte vajzës së saj. “[Ai ishte] aq i dashuruar me të, kjo është ajo që më ka tronditur. Si i çmendur pas saj… deri në atë pikë sa ishte i fiksuar”, tha ajo.
Ajo tha se Kulla kohët e fundit ishte ndarë nga ai. “Kohët e fundit më ka thënë se duhet të largohem prej tij”, tha Karen.
“Ajo shkonte ta takonte dhe i thoshte “kjo ka mbaruar” dhe kjo është ajo që bëri në fundjavë”, tha Karen.
