Një përleshje e dhunshme ndodhi rreth orës 01:00 të mëngjesit të së dielës në rrugën “Pellizza da Volpedo”, në zonën Amendola të Milanos.

Një 32-vjeçar egjiptian u sulmua dhe u godit disa herë me thikë nga një grup prej rreth dhjetë personash. Ai u gjet i plagosur rëndë përpara një ndërtese dhe u transportua me urgjencë në spitalin Niguarda në gjendje të rëndë, por jashtë rrezikut për jetën.

Sipas informacioneve të para, viktima ndodhej në shoqërinë e dy bashkëkombasve të tij kur ndodhi sulmi. Grupi i agresorëve, që përfshinte persona nga Afrika e Veriut dhe nga komuniteti shqiptar, u largua menjëherë pas incidentit, duke e lënë të plagosurin në vendngjarje. Fillimisht u raportua për të shtëna me armë zjarri, por më vonë u konfirmua se nuk kishte plagë nga armë zjarri dhe në vendin e ngjarjes nuk u gjetën gëzhoja.

Hetimet janë duke vazhduar për të identifikuar autorët dhe për të sqaruar shkaqet e ngjarjes. Dy egjiptianët e tjerë që ndodheshin me viktimën janë marrë në pyetje nga karabinierët dhe kanë dhënë versionin e tyre për atë që ndodhi. Forcat hetimore kanë sekuestruar pamjet e kamerave të sigurisë në zonë për të zbuluar më shumë rreth incidentit dhe për të identifikuar autorët.

Në vendngjarje kanë ndërhyrë edhe specialistët e hetimeve shkencore për të mbledhur prova materiale që mund të ndihmojnë në zbardhjen e plotë të ngjarjes.

Nga 1 janari 2026, paga minimale në Shqipëri do të rritet nga 40 mijë në 50 mijë lekë, ose rreth 500 euro, duke përmbushur një nga premtimet kryesore elektorale të qeverisë socialiste në zgjedhjet e 11 majit.

Qeveria ka garantuar se për 18 muajt e parë do të mbulojë vetë kostot shtesë të sigurimeve shoqërore dhe shëndetësore që vijnë si pasojë e rritjes së pagës minimale, në mënyrë që as punëdhënësit e as punëmarrësit të mos rëndohen financiarisht. Pas kësaj periudhe, përgjegjësia i kalon plotësisht bizneseve, çka ka ngjallur shqetësim për rritje të kostove të operimit dhe rrezikun e shtimit të informalitetit.

“Rritja e pagës minimale është një hap i rëndësishëm social që prek direkt shtresat më të brishta të tregut të punës, por duhet të shoqërohet me politika mbështetëse për biznesin e vogël”, u shpreh Erion Muça, ekspert i tregut të punës.

Nga ana tjetër, Zef Preçi, analist i ekonomisë, e cilëson këtë masë si më shumë një veprim propagandistik sesa një politikë zhvillimi: “Pa analiza të plota mbi produktivitetin dhe kostot e biznesit, rritja e pagës minimale mund të sjellë pasoja negative, përfshirë mbylljen e vendeve të punës dhe rritjen e punësimit informal”.

Edhe sipërmarrësit shprehin shqetësime. Florian Zekja, pronar në sektorin e manifakturës, theksoi se pas mbarimit të periudhës së subvencionimit, kompanitë do të përballen me presion të lartë financiar dhe do të detyrohen të rishikojnë strategjitë e tyre të punësimit dhe investimit.

Aktualisht, Shqipëria mbetet ndër vendet me pagën minimale më të ulët në rajon, duke lënë pas vetëm Kosovën. Në krye të renditjes qëndron Mali i Zi me 670 euro, i ndjekur nga Serbia me 618 euro, ndërsa Maqedonia e Veriut dhe Bosnje-Hercegovina pozicionohen në mes.

Një 50-vjeçar shqiptar u arrestua në kufirin greko-shqiptar pasi u kap me 21.5 kh heroinë të ndara në 43 pako najloni.

Sipas mediave greke, policia e Ksanthit kishte informacione se shqiptari do të transportonte një sasi të madhe heroine nga Shqipëria në Greqi nëpërmjet një shtegu specifik “sekret” në vargmalin e Follorinës.

Të enjten në mëngjes, organizuan operacionin policor në Follorinë duke i bërë pritë 55-vjeçarit.

Ai u kap duke mbajtur një çantë shpine që përmbante 21.5 kilogramë heroinë dhe u arrestua.

Vlera e heroinës së sekuestruar në “treg” shitet nga 15 deri në 30 euro për gram, ndërsa kjo është sasia më e madhe e drogës e sekuestruar ndonjëherë nga Zyra e Zbatimit të Ligjit për Drogën në Xanthi.

Ndarja nga jeta e Kreshnik Tomanit një muaj më parë, baba i tre fëmijëve të mitur, ka prekur thellë zemrat e shumë shqiptarëve.

34 vjeçari u përplas nga një makinë ndërkohë që po kalonte rrugën, e pas 10 ditëve në koma ai nuk mundi të mbijetonte.

Emisioni “Për Shqiptarët” në Top Channel ia doli për t’i ndihmuar e për të plotësuar amanetin e fundit të Kreshnikut, një shtëpi për fëmijët e tij.

Kreshniku ka qenë jo vetëm një bashkëshort i mirë, por një baba i jashtëzakonshëm për tre fëmijët e tij, e në mënyrë të veçantë për Nikitën, fëmija i tyre i parë. Ajo beson ende sot e kësaj dite se ai aksident është vetëm një ëndërr.

“Më plotësonte çdo dëshirë, nuk më thoshte kurrë jo për asgjë. Ka qenë baba shumë i mirë, kushdo do ishte me fat ta kishte një baba si ai. Nuk e shpreh dot të gjithë dashurinë që kam pasur për atë. Ishte shumë i veçantë për mua. Babain doja më shumë. Për ne erdhi në Fier, të realizonte ëndrrën time të isha këngëtare. Më thoshte gjithmonë mëso, kam në plan t’ja realizoj dëshirën babait. Do doja që këtë vit shkollor ta nisja me babin, por nuk ndodhi ashtu. Ndonjëherë mendoj se është ëndërr, por pastaj kuptoj që është realit. Na kishte premtuar një papagall, nuk na e bleu dot. Të kishim një shtëpi, dhe të jetonim të gjithë bashkë”.

Bashkëshortja e tij rrëfeu ditën kur mësoi për aksidentin, që do t’i ndryshonte gjithë jetën e saj.

“Hapa telefonin dhe pashë që kishte ndodhur një aksident. Mora vesh që ishte burri im, kur shkova i gjeta shapkën. Nuk e njoha, ishte shpërfyturuar. Sa plagë ka marrë, çfarë ka ndjerë në ato momente. U dergjëm 10 ditë në spital, por nuk ia doli. Përse më la vetëm? Nuk e prisja të ndodhte kështu, nuk e kisha imagjinuar kështu. Më preu krahët. Vajzat çdo ditë kalojnë te vendi i aksidentit dhe kthejnë kokën, sepse është shenja atje”-tregoi ajo sonte.

Top Channel

Prej 15 shtatorit Pano Ruçi, babai i Denis Ruçit, të riut shqiptar që humbi jetën në tragjedinë hekurudhore në Tempi të Greqisë, ka nisur një grevë urie përpara godinës së Parlamentit Grek në Athinë.

Ruçi kërkon për zbardhjen e fatit të vërtetë të të birit, i cili humbi jetën dy vite më parë, në një nga aksidentet më të rënda hekurudhore në historinë e Greqisë, ku u shënuan dhjetëra viktima. Ai shprehet se ka dyshime serioze mbi identitetin e trupit që iu dorëzua si i biri, duke pretenduar se qeveria greke e ka mashtruar.

Sipas tij, ka shumë mundësi që trupi i Denis Ruçit është djegur plotësisht gjatë aksidentit, për shkak të lëndëve të fuqishme djegëse dhe se nuk ndodhet në varrin ku prehet.

“Nuk dua më heshtje. Dua të zhvarros trupin. Nuk jam i bindur që është djali im. Dua të di të vërtetën, edhe nëse ajo më shkatërron”-, është shprehur ai për mediat greke.

Familja Ruçi prej dy vitesh ka kërkuar transparencë dhe verifikim të ADN-së, por pretendon se nuk ka marrë përgjigje zyrtare. Ngjarja tragjike në Tempi tronditi Greqinë në shkurt të vitit 2023, kur një tren pasagjerësh u përplas me një tren mallrash, duke lënë mbi 57 të vdekur, shumica të rinj studentë.